वाळूजमहानगर : मोबाइलचे ‘ईएमआय’ न भरल्यामुळे कर्जपुरवठा करणाऱ्या कंपनीने तो बंद केला. त्यामुळे मोबाइल घेऊन देणाऱ्यासह तिघांना बेदम मारहाण करून डोके फोडल्याची घटना घडली. या प्रकरणी चौघांविरुद्ध गुन्हा नोंद करण्यात आला. ही घटना रांजणगाव शेणपुंजी येथे घडली.

पोलिस तक्रारीचा आशय असा ः रांजणगाव (शेणपुंजी) येथील भगवान देवराव घुगे यांच्याकडे बाबासाहेब शिंदे (रा. रांजणगाव) मुलगा ओमकार यास मोबाइल फोन घेऊन देण्याचा तगादा लावला. घुगे यांनी एका फायनान्स कंपनीकडून स्वत:च्या नावे १६ हजारांच्या कर्जावर ओमकार यास मोबाइल घेऊन दिला. दरम्यान, ओमकारने केवळ एकच ईएमआय भरला.

त्यामुळे कंपनीने मोबाइल बंद केला. यावरून ओमकार, त्याची आई सुरेखा आणि दोन अनोळखी तरुण घुगे यांच्या घरी गेले. सुरेखा शिंदे यांनी घुगे यांना ‘तुम्ही फायनान्स कंपनीला सांगून माझ्या मुलाचा मोबाइल का बंद केला?’ या कारणावरून शिवीगाळ करीत घुगे यांना मारहाण केली. यावेळी आशामती आणि मीरा आघाव हे मदतीसाठी आले असता त्यांनाही मारहाण केली. या प्रकरणी भगवान घुगे यांच्या फिर्यादीवरून सुरेखा शिंदे, ओमकार शिंदे आणि दोन अनोळखी तरुणाविरुद्ध वाळूज एमआयडीसी पोलिस ठाण्यात गुन्हा नोंद करण्यात आला.