पिशोर : तपोवन (ता.कन्नड) येथे साल्या-मेव्हण्यात दारूवरून झालेल्या वादात मेव्हण्याचा कुऱ्हाडीचे घाव घालून खून झाल्याची घटना गुरुवारी (ता.१३) घडली. याप्रकरणी पिशोर पोलिस ठाण्यात गुन्हा दाखल करण्यात आला आहे.

रंजीत अंकुश माळी (वय ४५ रा.घुसर ता.कन्नड ह.मू. तपोवन शिवार) असे मृताचे नाव आहे. तर नंदू बाबू गायकवाड (रा.तपोवन शिवार ता.कन्नड) असे आरोपीचे नाव आहे. याबाबत अधिक माहिती अशी की, मृत आरोपी हे नात्याने साले व मेव्हणे आहेत. हे दोघेही तपोवन शिवारात एकमेकांच्या शेजारी राहतात. मृत रंजीत माळी व आरोपी नंदू गायकवाड हे गुरुवारी सायंकाळी सात वाजेच्या सुमारास तपोवन गावात किराणा सामान खरेदी करण्यासाठी गेले होते.

साडेसात वाजेच्या सुमारास वस्तीवर परत येत असताना रंजीतला नंदूने दारू पिण्यासाठी पैसे मागितले. परंतु त्याने नंदूला पैसे दिले नाही. यानंतर घरी आल्यानंतर रंजीतने पत्नी कल्पना हिला तिच्या भावाने दारूला पैसे मागितल्याचे व शिवीगाळ केल्याचे सांगितले. मृताची पत्नी भावाला जाब विचारण्यास गेली व भावाला समजावून सांगत असतानाच नंदूने मेव्हण्याच्या मानेवर व खांद्यावर दोन वार केले व तो घटनास्थळावरून शेजारील डोंगरात पळून गेला.

यात रंजीत जागेवर मृत झाला. घटनेची माहिती मिळताच सहायक पोलिस निरीक्षक कोमल शिंदे व पोलिस उपनिरीक्षक सतीश बडे यांनी घटनास्थळी धाव घेतली व पंचनामा केला. करंजखेड आरोग्य उपकेंद्रात डॉ. अस्मा खान यांनी शवविच्छेदन करून मृतदेह नातेवाइकांच्या ताब्यात दिला. गुरुवारी मृताची पत्नी कल्पना माळी हिच्या फिर्यादीवरून पिशोर पोलिस ठाण्यात गुन्हा दाखल करण्यात आला आहे.