औरंगाबाद: शिवेसना हा शिस्त आणि आदेशावर चालणारा पक्ष आहे. संघटनेत केले जाणारे बदल हे वरिष्ठांच्या आदेशानुसार आणि सर्वांना विश्वासात घेऊनच केले जातात. त्यामुळे वरिष्ठांचे आदेश डावलणाऱ्या आणि पक्षशिस्त मोडणाऱ्यांची गय केली जाणार नाही, त्यांच्यावर कडक कारवाई पक्षाच्या वतीने लवकरच केली जाईल, असा इशारा बीड जिल्ह्याचे संपर्कप्रमुख शिवसेना नेते चंद्रकांत खैरे यांनी दिला आहे.

बीड जिल्हाप्रमुख अप्पासाहेब जाधव यांच्या नियुक्तीनंतर जिल्ह्यात शिवसेनेतील अंतर्गत गटबाजी चव्हाट्यावर आली. त्यातच जाधव यांची जिल्हाप्रमुखपदी निवड झाल्याबद्दल काढण्यात आलेल्या मिरवणुकीतच त्यांच्या निवडीला माजलगाव येथील शिवसेना शहरप्रमुखांनी विरोध केला. मिरवणुकीतच जाधव यांच्या अंगावर वंगण टाकण्याचा प्रयत्न झाला, त्यामुळे जाधव समर्थकांनी त्याला चोप दिला. झाल्या प्रकारामुळे एकच खळबळ उडाली, या प्रकारावर बीडचे संपर्कप्रमुख शिवसेना नेते चंद्रकांत खैरे यांनी कारवाईचा इशारा दिला आहे.

मराठवाड्यातील बीड, लातूर आणि उस्मानाबाद या जिल्ह्यांची संघटनात्मक जबाबदारी शिवसेना नेते चंद्रकांत खैरे यांच्यावर आहे. गेल्या काही दिवसांत नव्याने पक्षाची बांधणी आणि पदाधिकारी बदलण्याच्या दृष्टीने त्यांनी या तीनही जिल्ह्यांचा दौरा केला होता. त्यानंतर बीड आणि लातूर या जिल्ह्यांतील प्रमुख पदाधिकाऱ्यांच्या नेमणुका करण्यात आल्या. यात जिल्हाप्रमुख, उपजिल्हाप्रमुखांची नव्याने नेमणूक करण्यात आली. लातूरमध्ये केलेले बदल स्थानिक शिवसेनेच्या पदाधिकाऱ्यांनी स्वीकारले असले तरी बीडमध्ये मात्र नव्या जिल्हाप्रमुखांच्या निवडीवरून वाद निर्माण झाला.

बेशिस्त खपवून घेणार नाही..
बीड जिल्ह्याचे शिवसेना संपर्कप्रमुख चंद्रकांत खैरे यांच्यांशी संपर्क साधला असता त्यांनी या प्रकाराबद्दल संताप व्यक्त केला. खैरे म्हणाले, जाधव यांची जिल्हाप्रमुखपदी झालेली निवड ही सर्वानुमते आणि पक्षप्रमुख उद्धव ठाकरे यांच्या आदेशाने झाली आहे. जिल्हाप्रमुखांच्या अंगावर काळे फेकण्याचा झालेला प्रकार आणि त्यानंतर झालेली मारहाण हे चुकीचे आहे. याची पक्षाने गंभीर दखल घेतली आहे. शिवसेनेत अशा प्रकारची बेशिस्त कधीच खपवून घेतली जाणार नाही.