औरंगाबाद: कोरोनाप्रतिबंधक कोविशिल्ड लसीचा तुटवडा निर्माण झाल्याने शहरात दुसऱ्या डोससाठी वेटींग एक लाखावर गेली आहे. असे असताना महापालिकेला शुक्रवारी (ता. २३) रात्री सुमारे सात हजार लसी मिळण्याची शक्यता आहे. लसी उपलब्ध झाल्यानंतर शनिवारी (ता. २४) ३९ केंद्रावर लसीकरण केले जाणार आहे. यात दुसऱ्या डोससाठी ३४ केंद्रावर व्यवस्था करण्यात आली आहे. केंद्र शासनाकडून कोविशिल्ड लसींचा साठा मुबलक प्रमाणात मिळत नसल्यामुळे शहरातील लसीकरण मोहिमेला ब्रेक लागला आहे. महापालिकेला ११ लाखापेक्षा जास्त लसीकरणाचा उद्दिष्ट आहे तर आत्तापर्यंत पाच लाख ३६ हजार ८८८ नागरिकांचे लसीकरण झाले आहे.

महापालिकेची दररोज सुमारे १० ते २० हजार लस देण्याची तयारी आहे पण लसींचा साठा आठवड्यातून एक-दोनवेळाच तेही पाच ते सात हजार एवढाच मिळत आहे. त्यामुळे दुसरा डोस घेणाऱ्यांची वेटींग वाढतच चालली आहे. शुक्रवारी सुमारे एक लाख नागरिक दुसऱ्या डोससाठी वेटींगवर होते. दरम्यान शुक्रवारी रात्री महापालिकेला सात हजार लसी मिळण्याची शक्यता आहे. त्यानुसार शनिवारी दुसरा डोस देण्यासाठी ३४ केंद्र तर पहिला डोस घेण्यासाठी पाच केंद्रावर व्यवस्था करण्यात आली आहे.

पहिल्या डोससाठी कोविन अ‍ॅपवर नोंदणी करणे बंधनकारक आहे तर दुसऱ्या डोससाठी कुपन दिले जाणार आहेत. पहिल्या डोससाठी नोंदणी केलेल्या नागरिकांनीच केंद्रावर यावे, इतरांनी गर्दी करू नये, असे महापालिकेच्या आरोग्य विभागातर्फे सांगण्यात आले.