सिल्लोड : जेवणाच्या पार्टीमध्ये मटण जास्त घेण्याच्या कारणावरून एका मित्राने दुसऱ्या मित्राचा लोखंडी टामीने घाव घालून खून केला. ही घटना धारला (ता. सिल्लोड) येथील शेतशिवारात सोमवारी (ता.२९) रात्री साडेअकरा वाजेच्या सुमारास घडली.

या प्रकरणी माधव मोटे (रा. धारला, ता. सिल्लोड) यांनी दिलेल्या तक्रारीत म्हटले आहे की, टापूमंडी (जि. खंडवा, मध्यप्रदेश) येथील दोन तरूण मजुरी कामासाठी आले होते. त्यांचे मामा त्र्यंबक सोनवणे यांच्या शेतात ते काम करीत होते. जितेंद्र धृवे व ओमजय जगदीश ठाकूर दोघे मद्य प्राशन करून मटण पार्टी करीत होते. दोघांमध्ये मटण जास्त घेण्यावरून वाद झाला. यामध्ये ओमजय ठाकूर याने जितेंद्र धृवे (वय- ४०) यास लोखंडी रॉडने मारहाण केली. यामध्ये त्याचा मृत्यू झाला.

घटनेची माहिती मिळताच सिल्लोड ग्रामीण पोलिस ठाण्याचे पोलिस निरीक्षक सीताराम मेहेत्रे, कर्मचारी सचिन सोनार, अनंत जोशी, राजेंद्र काकडे, दीपक इंगळे, यतीन कुलकर्णी यांनी घटनास्थळी भेट देत पंचनामा केला. या प्रकरणी संशयित आरोपी ओमजय ठाकूर (रा. हादरा, मध्य प्रदेश) याच्याविरोधात गुन्हा दाखल झाला.