पाचोड (जि.औरंगाबाद) : बीडकडून औरंगाबादकडे जाणाऱ्या दुचाकीस समोरुन चुकीच्या दिशेने भरधाव वेगात येणाऱ्या कारने जोराची धडक दिल्याने दुचाकीवरील सीमा सुरक्षा बलाचा जवान जागीच ठार झाला. ही घटना औरंगाबाद-सोलापुर राष्ट्रीय महामार्गावरील डोमेगाव फाट्याजवळ गुरुवारी (ता.२०) सायंकाळी साडेसहा वाजेच्या सुमारास घडली. यासंबंधी अधिक माहीती अशी, सीमा सुरक्षा बलाचा जवान (बीएसएफ) राजेंद्रगिर शामगिर गिरी (वय ४५, रा.शिवराई, जि.औरंगाबाद) (Aurangabad) हे आपल्या दुचाकीवरुन (एमएच २o एएक्स ५०३८) बीडकडुन औरंगाबादला येत असताना धुळे-सोलापुर राष्ट्रीय महामार्गावरील डोमेगाव फाट्याजवळ समोरुन चुकीच्या दिशने येणाऱ्या भरधाव वेगातील कारने जोराची धडक दिली. यात दुचाकीस्वार राजेंद्रगिर गिरी हे जागीच ठार झाला. (CRPF Jawan Died In Accident On Dhule-Solapur National Highway In Aurangabad)

हा अपघात समोरासमोर होऊन कारच्या समोरील भागाचा तर दुचाकीचा पुर्णतः चुराडा झाला. हा अपघात झाल्यानंतर आजुबाजूला कुणी नसल्याचे पाहुन कार चालकाने मोठ्या शितीफीने कारच्या दोन्ही बाजूच्या नंबरप्लेट काढून घटनास्थळावरून पोबारा केला. दरम्यान महामार्गालगत शेतात काम करणाऱ्या शेतमजुरांनी पोलिसांसह भोकरवाडी टोलनाक्यावरील रुग्णवाहिका चालकास या घटनेची मोबाईलवरून माहीती दिली. (Aurangabad Accident)

ही माहीती मिळताच रूग्णवाहिका कर्मचारी महेश जाधव, गणेश चेडे, आत्माराम गाडेकर, रवी गाडे यांनी घटनास्थळी धाव घेऊन राजेंद्रगिर गिरी यास पाचोडच्या ग्रामीण रूग्णालयात उपचारार्थ दाखल केले असता वैद्यकीय अधिकारी डॉ. बाबासाहेब घुगे यांनी त्यांस तपासूून मृत घोषित केले. या घटनेची नोंद उशिरापर्यत पोलिस ठाण्यात नोंद करण्यात आली नव्हती.