छत्रपती संभाजीनगर - विदेशी पर्यटकांना शाही पर्यटवारी घडविणारी ‘डेक्कन ओडीसी’ तीन वर्षांपासून बंद झाली होती. कोरोना काळासह इतर कारणे यासाठी दिली जात होती. आता ती पुन्हा नव्या रुपात, नव्या ढंगात पर्यटकांना सेवा देण्यासाठी सज्ज झाली आहे. शुक्रवारी (ता.६) ही रेल्वे २० प्रवाशी घेऊन जिल्ह्याच्या पर्यटनासाठी येत आहे.

एमटीडीसीने ''इबिक्स''सोबत केलेल्या भागिदारीच्या करारामुळे डेक्कन ओडीसीतून महाराष्ट्र पर्यटन विकास महामंडळ हे रेल्वे चालवत आहे. देशातील शाही रेल्वेपैकी एक असणारी डेक्कन ओडिसी तीन वर्षांनंतर पुन्हा धावणार आहे. विशेष म्हणजे, ही गाडी नव्या रूपात आणि नव्या ढंगात सजविण्यात आली आहे. १६ मार्च २०२० ला शेवटची डेक्कन ओडीसी रेल्वे आली होती.

शुक्रवारी दुपारी १.३० वाजता डेक्कन ओडिसीतील २० प्रवासी वेरूळ व दौलताबादच्या पर्यटनस्थळांना भेट देतील. छत्रपती संभाजीनगर रेल्वे स्टेशनवर त्यांचे महाराष्ट्रीयन पारंपरिक पद्धतीने दिलीप खंडेराय व समूह स्वागत करणार आहे. डेक्कन ओडिसी रेल्वेमध्ये एखाद्या पंचतारांकित हॉटेलमध्ये मिळणाऱ्या सर्व सुविधा असतील. स्पा, पार्लर, जीम, विविध पदार्थांची रेलचेल असणारे रेस्टॉरंट या रेल्वेला चार चाँद लावत आहेत, अशी माहिती औरंगाबाद टुरिझम डेव्हलपमेंटस फाऊंडेशनचे अध्यक्ष जसवंत सिंग यांनी सांगितले.