छत्रपती संभाजीनगर : महापालिकेतील १२३ पदांची भरती प्रक्रिया सध्या सुरू आहे. त्यासोबत आणखी २८३ रिक्त पदे भरण्यासाठी राज्य शासनाने मंजुरी दिली आहे. त्यानुसार रिक्त २७४ पदांचा मसुदा तयार करून प्रशासनाने शासन नियुक्त आयबीपीएस कंपनीला पाठविला आहे. या कंपनीकडून जाहिरात प्रसिद्ध केली जाणार आहे.

महापालिकेतील हजारो कर्मचारी-अधिकारी निवृत्त झाले आहेत. त्यामुळे रिक्त पदांची संख्या दिवसेंदिवस वाढत आहे. रिक्त पदांवर टप्प्याटप्प्‍याने नोकरभरती केली जात आहे. पहिल्या टप्प्यात १२३ रिक्त पदे भरण्यास शासनाने मंजुरी दिली होती. त्यानुसार पदभरतीची प्रक्रिया शासन नियुक्त आयबीपीएस कंपनीतर्फे केली जात आहे.

अग्निशमन विभागातील २९ पदांसाठी सुरवातीला ऑनलाइन परीक्षा घेण्यात आली होती. या परीक्षेचा निकाल कंपनीकडून अंतिम करण्यात आला आहे. पुढील प्रक्रिया पूर्ण झाल्यानंतर पात्र उमेदवारांच्या कागदपत्रांची तपासणी केली जाईल. त्यानंतर त्यांची वैद्यकीय तपासणी करण्यात येणार असल्याचे अतिरिक्त आयुक्त रणजित पाटील यांनी सांगितले.

दरम्यान, राज्य शासनाने २८३ रिक्त पदे भरण्यास मंजुरी दिली आहे. ही रिक्त पदे भरण्यासाठी आयबीपीएस कंपनीवरच जबाबदारी सोपविण्यात आली आहे. याती २७४ रिक्त पदांचा नियमानुसार मसुदा तयार करण्यात आला असून, हा मसुदा आयबीपीएस कंपनीकडून अंतिम करून घेतला जाणार आहे. मसुदा अंतिम झाल्यानंतर पदभरतीची जाहिरात प्रसिद्ध केली जाणार असल्याचे पाटील यांनी सांगितले.