छत्रपती संभाजीनगर : जिल्हा परिषदेच्या तब्बल १९४३ शाळांचे १ कोटी ८ लाख ९ हजार ३२८ रुपये वीजबील थकीत आहे. वीज बील थकवल्याप्रकरणी महावितरण विभागाकडून अनेक शाळांचे वीज मीटर काढण्यात आले आहे. वीज नसल्यामुळे शाळेतील डिजिटल साहित्य धूळखात पडले आहे.

एकीकडे शाळांना वीज देयकांचा भार न परवडणारा असल्याने शाळा सौर पॅनलवर करण्याचा निर्णय शिक्षण विभागाने घेतला होता. त्यानुसार अद्यापपर्यंत निम्म्या शाळांतही सौर पॅनल लागलेले नाहीत. काही पॅनल बंद पडले आहेत.

त्यातच शाळांचा वीजपुरवठा खंडित झाल्याने पुन्हा वीजपुरवठा सुरळीत करण्यासाठी निधीची तरतूद नसल्याने मुख्याध्यापकांनी हात वर केले आहेत. सर्वाधिक वीजपुरवठा खंडित झालेल्या शाळा वैजापूर तालुक्यात आहेत.

शाळा हा विषय व्यवस्थापन समितीच्या अधिकारात येतो. या शाळांत काय स्थिती आहे, याचे कुठलेही देणे-घेणे गावातील लोकप्रतिनीधींना नसल्याचे दिसून येते. छत्रपती संभाजीनगर जिल्ह्यात जिल्हा परिषदेच्या सुमारे २१३० शाळा आहेत. शासनाने शाळांमध्ये डिजिटल तंत्रज्ञान पुरवले आहे. बहुतांश शाळा स्मार्ट होत असताना शाळांमध्ये वीजपुरवठा नसेल तर डिजिटल तंत्रज्ञानाचा काय फायदा होणार, असा प्रश्न उपस्थित होत आहे.

तालुकानिहाय थकीत वीजबिल

तालुका - शाळा - थकीत विजबिल

• कन्नड - २७३ - १२,८३,६२४

• खुलताबाद -९२ -४,२२,४४०

• गंगापूर -२३२- ११,९५,३६०

• छत्रपती संभाजीनगर -२५२ -२२,४७,८५०

• पैठण -२४९ -१७,४५,९५०

• फुलंब्री -१८१ -७,७३,४७५

• वैजापूर -३१० -१६,९७,६६५

• सिल्लोड -२६० -९,७०,८८४

• सोयगाव - ९४ -४,७२,०८०

• एकूण -१९४३ - १,०८,०९,३२८

शाळांना मिळणारा निधी अत्यल्प

पूर्वी जिल्हा परिषद शाळांना शैक्षणिक साहित्याच्या खर्चासाठी शासनाकडून सानुग्रह अनुदान दिले जात होते. ते कमी करून आता समग्र शिक्षा अभियानांतर्गत निधी दिला जातो. मात्र, हा निधी चार टप्प्यांत अत्यल्प मिळतो.

या निधीतून शालेय खर्चासह वीजबिलसुद्धा भरावे लागत असल्याने, त्यात महावितरणच्या वाढत्या वीजबिलामुळेही वीज बिले भरणे शाळा प्रशासनाला जड जात आहे. त्यामुळे अनेक शाळांनी यातून मार्ग निघत नसल्याने वीजबिल भरले नसल्याचे ऐकायला मिळते.

जिल्हा परिषदेच्या शिक्षकांनी लोकवर्गणी करून जिल्ह्यातील जवळपास ८० टक्के शाळा डिजिटल केल्या आहेत. मात्र, आता वीजबिल भरले नसल्यामुळे शाळेतील संगणक, टीव्ही, डिजिटल बोर्ड साहित्य धूळखात पडून आहे. जिल्हा परिषदेच्या शाळांची गुणवत्ता वाढावयची असेल तर जिल्हा परिषदेने वीजबिल भरण्यासाठी विशेष तरतूद करायला हवी.

— विजय साळकर, जिल्हाध्यक्ष, शिक्षक समिती.

जिल्हा परिषद शिक्षण विभागाकडून थकीत वीजबिल असलेल्या शाळांची माहिती घेणे सुरू आहे. शाळांचे वीजबिल भरण्यासाठी प्रशासनाकडून तरतूद करण्यात आली आहे. लवकरच सर्व शाळांचे वीजबिल भरण्यात येईल.

— जयश्री चव्हाण, शिक्षणाधिकारी, जिल्हा परिषद