‘‘महाराष्ट्रात ४८ लोकसभेसाठी निवडणुका सुरू आहेत. यात दोन शिवसेना, दोन राष्ट्रवादी, भाजप आणि अर्धी काँग्रेस, या एकाही पक्षाने मुस्लिम उमेदवार दिला नाही. आता नव्याने स्वतःला सेक्युलर म्हणून घेणाऱ्या उद्धव ठाकरेंच्या शिवसेनेनेही एकही उमेदवार दिला नाही. हे उद्धव ठाकरे जेव्हा मुख्यमंत्री व त्यांचा मुलगा मुरब्बी राजकारणी होईल तेव्हा ते मुस्लिमांना विसरून जातील’’, असे एमआयएमचे राष्ट्रीय अध्यक्ष खासदार असदुद्दीन ओवैसी सोमवारी (ता. सहा) म्हणाले.

अमखास मैदानावर एमआयएमच्या प्रचारार्थ झालेल्या सभेत ते बोलत होते. ते म्हणाले, ‘‘तीस वर्षांपासून इथे एक उमेदवार खान पाहिजे की बाण असा घोषणा करत जातीय वातावरण निर्माण करत जिंकायचा. मात्र, वर्ष २०१९ ला चित्र पालटले आणि जिल्ह्यातील सर्व समाजातील मतदारांनी इम्तियाज जलील यांनी निवडून आणले.

आता चंद्रकांत खैर हे ईदगा, मशीद आणि नमाजापर्यंत पोचले आहेत आणि निवडून आल्यानंतर पुढील पाच वर्षांत काय होईल याचा विचार करा. जेव्हा संसदेमध्ये यूपीए, ट्रिपल तलाक, एनआरसीचा कायदा तयार होत होता त्यावेळेस शिवसेना आणि राष्ट्रवादी यांनी पाठिंबा दिला आणि हे आता मुस्लिमांच्या हिताची गोष्ट करीत आहे. हा केवळ निवडणुकीचा जुमला आहे.’’ याशिवाय मोदी, शिवसेनेचे उमेदवार संदीपान भुमरे यांच्यावरही त्यांनी सडकून टीका केली.

तुमच्यामुळे आम्हाला दुसऱ्यांची मते नाहीत

‘‘इंडिया आघाडी जेव्हा निर्माण झाली त्यावेळेस अनेक वेळा यांच्या आघाडीत सहभागी होण्यासाठी प्रयत्न केले. परंतु, ज्यावेळी सहभागी होण्याची विचार आला त्यावेळेस एका महाराष्ट्रातील मोठ्या नेत्यांनी सांगितले, की तुम्हाला सोबत घेतले तर इतर समाजाची आम्हाला मते पडत नाही’’, असेही असदुद्दीन ओवैसी यांनी सांगितले.