औरंगाबाद : दौलताबाद (Aurangabad) येथील महाराष्ट्र पब्लिक स्कूलने (Maharshtra Public School) मराठी माध्यम विभागाचे नववी, दहावीचे वर्ग बंद करण्याचा निर्णय घेतला आहे. शाळा प्रशासनाच्या विरोधात मंगळवारी (ता.१८) पालकांसोबत मनसेच्या (Maharshtra Navnirman Sena) शिष्टमंडळाने शाळेत धडक मारत या निर्णयाचा विरोध केला. विद्यार्थ्यांना जबरदस्तीने टीसी दिल्या तर शाळेविरोधात लढा उभा करु, असा इशारा देण्यात आला. यावेळी पालकांतर्फे शाळा प्रशासनाला निवेदन देण्यात आले. महाराष्ट्र पब्लिक स्कूलचे प्रशासन सोमवारी शाळा बंद करणार असल्याची माहिती मिळाल्यानंतर पालकांनी मनसेच्या पदाधिकाऱ्यांशी संपर्क केला होता. (Maharashtra Public School To Be Close Ninth, Tenth Divisions)

त्यानंतर जिल्हाध्यक्ष सुहास दाशरथे यांच्या मार्गदर्शनाखाली मंगळवारी (ता.१८) मनसेच्या शिष्टमंडळाने शाळेत धडक मारली. शाळा अशा प्रकारे कोणतेही वर्ग बंद करण्याचा निर्णय शाळा घेवू शकत नाही. जर शाळा जबरदस्तीने विद्यार्थ्याला टीसी देत असेल; तर मनसे पालकांसोबत शाळेविरोधात लढा देण्यास खंबीर आहे, असे यावेळी शाळेच्या व्यवस्थापनाला सांगण्यात आले. दरम्यान पालकांच्यावतीने शाळेला निवेदनही देण्यात आले. यावेळी मनसे शिक्षक सेनेचे राज्य सचिव सुभाष मेहेर, बिजू मारक, जिल्हा संघटक संदीप कुलकर्णी, अशोक म्हस्के पाटील, मच्छिंद्र मोरे, सागर कुंटे, अनिकेत ठोकळ, नागेश देशमुख, राजेश इंगळे व विद्यार्थी पालक मोठ्या संख्येने उपस्थित होते.