औरंगाबाद : एखाद्या व्यवसाय दुसऱ्या पिढीकडे सोपविल्याची आपण अनेक उदाहरणे बघितली आहे. मात्र एका पित्याने घरफोड्या करून थकल्यानंतर चक्क मुलाला हाताशी धरून धूमस्टाइल मंगळसूत्र हिसकावण्याचा सपाटा लावल्याचे समोर आले आहे. बुलडाणा, औरंगाबाद, जालना, नगर, बीड आणि सोलापूर अशा सहा जिल्ह्यांत त्यांनी धुमाकूळ घातला असून तब्बल ४२ गुन्हे केल्याचे समोर आले आहे. यातील बापाला नुकतेच जवाहरनगर पोलिसांनी जालन्याहून ताब्यात घेतले. मात्र, त्याचा मुलगा फरार आहे. औरंगाबादेत हिसकावलेले सर्व मंगळसूत्र त्यांनी नगर जिल्ह्यात विक्री केले असून पोलिसांनी आतापर्यंत तीन गुन्ह्यातील दागिने जप्त केले आहेत.

शेख सलीम शेख अफजल (५२, रा. सैलानी ता. चिखली जि. बुलडाणा सध्या. रा. कासंबरी दर्गा पडेगाव) असे अटकेतील आरोपीच्या पित्याचे तर वसीम शेख असे पुत्राचे नाव आहे. ५ एप्रिलला मुलासोबत दुचाकीने शहरात आलेल्या सलीमने सिंधी कॉलनीत पुष्पाबाई गोकुलदास काल्डा (६४) या महिलेची तब्बल अडीच तोळ्यांची चेन हिसकावली होती. पोलिसांनी सीसीटीव्ही फुटेज जप्त केले होते. त्यात सलीम स्पष्टपणे दिसत आहे. दरम्यान, सैलानी दर्गा येथे बस्तान मांडलेला सलीम व त्याच्या मुलाने औरंगाबादेत तब्बल नऊ गुन्हे केल्याचे उघडकीस आले.

२१ गुन्ह्यांची दिली कबुली

एप्रिल, सप्टेंबर अशा वेगवेगळ्या महिन्यात ते औरंगाबादला आल्याचे फुटेज प्राप्त झाले आहे. याशिवाय त्याने सोलापूरमध्ये २१ गुन्हे केल्याची कबुली दिली असून जालना, बुलडाणा, बीड व नगरमध्येही या बाप-लेकाने धुमाकूळ घातला होता. जालना पोलिसांनी अटक केलेल्या सलीमकडून त्यांनी १८ तोळे सोने जप्त केले आहे. हे सर्व सोने त्याने विक्री केले होते. पोलिसांनी सराफांकडून ही रिकव्हरी केली. तो सध्या औरंगाबाद पोलिसांच्या ताब्यात आहे. जिन्सी, सिटी चौक पोलिसांनी त्याच्याकडून पाच तोळे दागिने जप्त केले आहेत. सध्या तो जवाहरनगर पोलिसांच्या ताब्यात आहे. पोलिस निरीक्षक संतोष पाटील, उपनिरीक्षक अजित दगडखैर, अंमलदार राजेश चव्हाण, जावेद पठाण, विजय वानखेडे यांच्या पथकाने नगरला जाऊन एक तोळ्याची चेन जप्त केली आहे. त्याला पुन्हा सिडको, क्रांती चौक आदी पोलिस अटक करणार आहेत अशी माहिती पोलिस सूत्रांनी दिली.