सिल्लोड - तालुक्यातील पानवडोद बुद्रुक येथे मंगळवारी (ता.12) रोजी गावकर्‍यांनी सरकारची प्रतिकात्मक अंत्ययात्रा काढली.तसेच येथील ग्रामपंचायतीचे उपसरपंच व सर्व सदस्य, विविध कार्यकारी सोसायटीचे चेअरमन, सर्व सदस्य, सिद्धेश्वर दूध उत्पादक संघ चेअरमन व सर्व सदस्य, तंटामुक्त समितीचे अध्यक्ष व सदस्य या सर्व पदाधिकाऱ्यांनी त्यांच्या पदाचे राजीनामे ग्रामसेवक यांचेकडे दिले.

मराठा आरक्षणाच्या समर्थनार्थ गावातील सर्व पदाधिकाऱ्यांनी सकाळीच आंदोलन करीत सामूहिक राजीनामे दिल्यामुळे याची मोठी चर्चा परिसरात सुरू झाली. विशेष म्हणजे येथील ग्रामपंचायतीच्या राखीव जागेतील सदस्य यांनी सुद्धा मराठा आरक्षण समर्थनार्थ राजीनामे दिले.

यावेळी आंदोलकांनी ग्रामपंचायत कार्यालयाला कुलूप ठोकले. महाराष्ट्र सरकारच्या निषेधार्थ मुख्यमंत्री एकनाथ शिंदे, उपमुख्यमंत्री देवेंद्र फडणवीस, उपमुख्यमंत्री अजित पवार यांची प्रतिकात्मक अंत्ययात्रा काढून त्यांची तिरडी जाळण्यात आली. यावेळी सर्व समाज बांधवांची उपस्थिती होती.

सरपंच देणार गटविकास अधिकाऱ्यांकडे राजीनामा.

येथील सर्व स्थानिक स्वराज्य संस्थेच्या पदाधिकाऱ्यांनी राजीनामे दिले असून, ग्रामपंचायतीच्या सरपंच भाग्यश्री भास्कर फुसे त्यांच्या पदाचा राजीनामा पंचायत समितीच्या गटविकास अधिकाऱ्यांना देणार असल्याची माहिती सरपंच पती भास्कर फुसे यांनी दिली.