औरंगाबाद: महाराष्‍ट्र लोकसेवा आयोगातर्फे (एमपीएससी) राज्यसेवा पूर्वपरीक्षा - २०२० रविवारी (ता.२१) झाली. येथील केंद्रात १९ हजार ६५६ उमेदवार परीक्षा देणार होते. त्यातील ६ हजार ३०० उमेदवारांनी दांडी मारली. सहा कोरोनाबाधितांनीही केंद्रावर येऊन परीक्षा दिली. शहरात विकेंड लॉकडाउन असल्याने उमेदवारांसाठी परीक्षा केंद्रापर्यंत सिटी बस चालवल्याने अनेकांची गैरसोय टळली. तर काही संघटना, संस्थांनी जेवण, खिचडीची सोय केली होती. 

औरंगाबाद जिल्‍ह्यात ५९ शाळा, महाविद्यालयांत परीक्षार्थींची व्यवस्था होती. पहिल्या सत्रात सकाळी १० ते १२ च्या दरम्यान परीक्षा झाली. त्यावेळी १९ हजार ६५६ पैकी १३ हजार ३४६ उमेदवारांनी परीक्षा दिली. यात ६३०० म्हणजे ३२.०७ टक्के उमेदवार गैरहजर होते. दुपारचे सत्र तीन ते पाचदरम्यान होते. यात १३ हजार ६२७ उमेदवारांनी हजेरी लावली. यात ६ हजार १९ म्हणजे ३०.६४ टक्के उमेदवार गैरहजर होते. पहिल्या सत्रापेक्षा दुसऱ्या सत्राला २८१ उमेदवारांची अधिक उपस्थिती होती. 

औरंगाबाद जिल्हा बँकेसाठी दुपारी दोन वाजेपर्यंत 90.4 टक्के मतदान

कोरोनाच्या पार्श्‍वभूमीवर सर्वच केंद्रांवर नियमांची कडक अंमलबजावणी करण्यात आली. काहीं केंद्राबाहेर सर्वांना रांगेत उभे करून एकत्रित सूचना देण्यात आल्या. काही केंद्रांना जिल्हाधिकारी सुनील चव्हाण, पोलिस आयुक्त डॉ. निखिल गुप्ता यांनीही भेटी दिल्या. परीक्षेसाठी आलेल्या उमेदवारांना आणि पालकांना त्रास होऊ नये, यासाठी लॉकडाउनमध्येही सूट होती. वाहतुकीसाठी सिटी बसने पुढाकार घेतल्याने उमेदवारांच्या होणाऱ्या आर्थिक लुटीला आळा बसला. 

कोरोनाबाधित उमेदवार केंद्रावर- 
औरंगपुरा येथील सरस्वती भुवन महाविद्यालयात कोरोनाबाधित परीक्षार्थी सकाळी रुग्णवाहिकेतून हजर झाला. रुग्णवाहिकेतून उतरून तो महाविद्यालयासमोर उभा राहिला. तुमची व्यवस्था सरस्वती भुवन शाळेत केल्याचे प्रशासनाने त्यांना सांगितले. पीपीई कीट घालून आलेला हा परीक्षार्थी हातात पाण्याची बाटली घेऊन गेटवरूनच स्वतंत्र परीक्षा खोलीपर्यंत गेला. पीपीई किट घालून आलेला परीक्षार्थी पाहून इतर सहकारी थोडे दचकले. इतर परीक्षार्थीही कोरोनाच्या पार्श्वभूमीवर काळजी घेताना दिसले.

कोविड केअर सेंटरमध्ये तरुणीचा विनयभंग! 

जेवणाची, नाश्‍त्याची सोय-
विकेंड लॉकडाउनमुळे हॉटेल्स बंद असल्याने रविवारी परीक्षेच्या दिवशी विद्यार्थ्यांना अखिल भारतीय विद्यार्थी परिषद, जनकल्याण समितीतर्फे शासकीय तंत्रनिकेतन महाविद्यालय, स्वामी विवेकानंद महाविद्यालय, पीईएस महाविद्यालय, सरस्वती भुवन महाविद्यालय, शिवछत्रपती महाविद्यालय, संत मीरा विद्यालय या परीक्षा केंद्रांवर फूड पॅकेट्स वाटप करण्यात आले. महिला कन्या महाविद्यालयात परीक्षार्थी मुलींसाठी तर मुकुल मंदिर शाळेत परीक्षार्थींसाठी जेवणाची सोय केली होती. काही केंद्रांवर अशी सोय नसल्याने विद्यार्थ्यांना दिवसभर उपाशी राहावे लागले. 

MPSC Exam: जेव्हा कोरोनाबाधित पेपर द्यायला परीक्षा केंद्रावर पोचतो...

स्मार्ट सिटी बस सेवेत- 
परीक्षार्थींची अडचण होऊ नये, म्हणून प्रशासनाकडून स्मार्ट सिटी बससेवा सुरू ठेवली होती. शहरातील प्रमुख १७ मार्गांवर बससेवा सकाळी सात ते नऊ व सायंकाळी पाच ते सातपर्यंत सुरू होती. उमेदवारांच्या परतीच्या सोयीसाठी काही केंद्रांवर बस थांबून होत्या. काही विद्यार्थ्यांना बससेवा सुरू असल्याचे माहीत नसल्याने त्यांना पायपीट करावी लागली.