औरंगाबाद: सिडको एन-१ येथील सरदार सिंग ॲण्ड सन्स पेट्रोलपंपाला महापालिकेच्या कर्मचाऱ्यांनी कोरोनाच्या नियमाचे उल्लंघन केल्याने शुक्रवारी (ता.२१) २५ हजार रुपयांचा दंड केला. दुपारी एकपर्यंत पेट्रोलपंप सुरु ठेवण्याचा नियम असताना आणि नेमके कोणत्या नियमाचे उल्लंघन झाले याची स्पष्टता न करताच ही कारवाई करण्यात आली. यामुळे शनिवारपासून (ता.२२) केवळ ७ ते ११ याच वेळेतच शहरातील पंप सुरु राहतील. त्यानंतर पंप बंद ठेवण्याचा निर्णय पेट्रोलियम-डिलर असोसिएशनतर्फे घेण्यात आल्याची माहिती असोसिएशनचे सचिव अखिल अब्बास यांनी दिली.

या कारवाईविषयी असोसिएशनतर्फे जिल्हाधिकारी आणि पोलिस आयुक्तांना निवेदन देण्यात आले आहे. या निवेदनाविषयी अखिल अब्बास म्हणाले की, आज सरदार सिंग ॲण्ड सन्स पंप चालकावर कोविड नियमांचे उल्लंघनप्रकरणी २५ हजारांचा दंड लावण्यात आला. मुळात ही कारवाई ११ वाजेदरम्यान करण्यात आली. यात नेमका कोणत्या नियमाचा भंग केला, त्याचा उल्लेख दंडाच्या पावतीत नाही. १७ एप्रिलला दिलेल्या नियमावलीत पेट्रोल पंप एक वाजेपर्यंत सुरु ठेवण्याचे आदेश देण्यात आले आहेत.

एक वाजेनंतर केवळ अत्यवाश्‍यक सेवांना सूट आहे. हा दंड एक वाजेपूर्वीच करण्यात आला आहे. यामुळे जिल्हाधिकारी आणि पोलिस आयुक्तांनी पंप सुरु ठेवण्याची निश्‍चीत वेळ सांगावी. गर्दी होऊ नये यासाठीची आम्ही काळजी घेत कोणताही गोंधळ होऊ देत नाही. यामुळे अशा प्रकारे कारवाई होत असेल तर, आम्ही ११ वाजेपर्यंतच पंप सुरु ठेवू.

आम्ही सर्व नियम पाळत आहोत. आमच्याकडे ११ वाजेनंतर कोण इंधन भरते याचे रेकॉर्ड तयार आहे. या कारवाईत नेमका कशाचा भंग केला ते स्पष्ट करावे. पंप सुरु ठेवण्याची वेळ निश्‍चित करावी. शनिवारपासून आम्ही केवळ ११ वाजेपर्यंत पंप सुरु ठेवणार आहोत.
-अखिल अब्बास, सचिव, पेट्रोल डिलर असोसिएशन