छत्रपती संभाजीनगर : साहाय्यभूत ठरणाऱ्या वैद्यकीय सेवांच्या पदव्युत्तर अभ्यासक्रमाची प्रवेशासाठी मंगळवारी (ता. आठ) पहिली निवड यादी जाहीर झाली. पीजीपी, पीजीओ, एमएस्सी (एसएलपी), (ऑडिओ), (पीॲण्डओ) अभ्यासक्रम फिजिओथेरपी (एमपीटीएच), ऑक्युपेशनल थेरपी (एमओटीएच), स्पीच आणि लँग्वेज पॅथॉलॉजी, ऑडिओलॉजी या विषयांच्या पदव्युत्तर अभ्यासक्रमाच्या पहिल्या फेरीतील प्रवेशाला बुधवारी (ता. ९) सुरवात झाली.

प्रवेशासाठी संस्था स्तरावरील फेरीचे वेळापत्रक सीईटी सेलकडून जाहीर झाले आहे. पीजीपी, पीजीओ, एमएस्सी (एसएलपी), (ऑडिओ), (पीॲण्डओ) अभ्यासक्रम फिजिओथेरपी (एमपीटीएच), ऑक्युपेशनल थेरपी (एमपीटीएच), स्पीच आणि लँग्वेज पॅथॉलॉजी, ऑडिओलॉजी या अभ्यासक्रमांच्या शैक्षणिक वर्ष २०२४-२५ साठी केंद्रीभूत प्रवेशासाठी घेतलेल्या सीईटीचा निकाल १९ सप्टेंबरला जाहीर झाला.

त्यानंतर या अभ्यासक्रमाच्या नोंदणीसाठीची प्रक्रिया राबवण्यात आली. नोंदणी केलेल्या विद्यार्थ्यांची अंतिम गुणवत्ता यादी ता. ४ रोजी जाहीर झाली. ता. ४ ते ७ ऑक्टोबरदरम्यान विद्यार्थ्यांना महाविद्यालय निवडण्यासाठीचा वेळ होता. त्यानंतर पहिल्या प्रवेश फेरीसाठी मंगळवारी निवड यादी जाहीर होऊन बुधवारी प्रवेश निश्‍चितीची प्रक्रिया सुरू झाली आहे. ता. १३ पर्यंत विद्यार्थ्यांना प्रवेश निश्‍चिती करता येणार आहे.

२६ पासून संस्था स्तरावरील प्रवेश

दुसऱ्या प्रवेश फेरीसाठी १५ ऑक्टोबरला यादी जाहीर होईल. १६ ते १९ ऑक्टोबर ही प्रवेश प्रक्रिया होईल. त्यानंतर तिसऱ्या फेरीसाठी २१ ऑक्टोबरला प्रवेश यादी जाहीर होईल. त्यानंतर २२ ते २५ ऑक्टोबरदरम्यान विद्यार्थ्यांना प्रवेश निश्‍चिती करायची आहे. त्यानंतर रिक्त राहिलेल्या जागांसाठी संस्था स्तरावरील प्रवेश प्रक्रिया २६ ऑक्टोबरपासून सुरू होणार आहे. अशी माहिती राज्य सामायिक प्रवेश परीक्षा कक्षाकडून देण्यात आली.