औरंगाबाद - शहरी स्थानिक स्वराज्य संस्थांचा कार्यकाळ संपला की पदाधिकाऱ्यांना शासकीय बंगला, वाहने परत करावी लागतात. प्रशासनाकडून ही कार्यवाही केली जाते. एरवी सामान्य परिस्थितीत ही प्रक्रिया सुरळीत सुरू असते. परंतु, ऎन कोरोनाच्या काळात काही महापालिकांची मुदत संपली आहे. औरंगाबाद महापालिकेचा कार्यकाळही नुकताच संपला. परंतु, बंगला आणि वाहने परत करण्यावरून येथे वेगळाच पेच निर्माण झाला आहे. 

हेही वाचा : कर्तव्य निभावताना हवे जबाबदारीचे भान   

प्रशासनाने पाठविले पत्र
महापौरपदाचा कार्यकाळ संपल्याने बंगला, गाडी ताब्यात द्या, असे पत्र बुधवारी (ता. २९) महापालिका प्रशासनाने नंदकुमार घोडेले यांना दिले. त्यावर अधिनियमातील तरतुदी व शासनाने पाठवलेल्या पत्रावर कायदेशीर सल्ला घ्या, अशी सूचना श्री. घोडेले यांनी प्रशासनाला केली. त्यात स्थायी समितीच्या सभापती जयश्री कुलकर्णी यांनी मात्र त्यांच्या ताब्यातील गाडी जमा केली. महापालिकेच्या ११५ नगरसेवकांचा पाच वर्षांचा कार्यकाळ मंगळवारी (ता.२८) संपला. त्यामुळे नगर विकास विभागाने आदेश काढून प्रशासक म्हणून आयुक्त आस्तिककुमार पांडेय यांची नियुक्ती केली आहे. महापौर, उपमहापौरांसह इतर पदाधिकाऱ्यांची मंगळवारीच मुदत संपल्याने महापौरांनी त्यांच्या ताब्यातील महापालिकेची गाडी व बंगला सोडणे प्रशासनाला अपेक्षित आहे. त्यानुसार प्रशासनाने घोडेले यांना गाडी व बंगला जमा करण्याची सूचना बुधवारी पत्र देऊन केली. हे पत्र मिळताच घोडेले यांनी प्रशासनाला पत्र लिहिले आहे. 

हेही वाचा : कोरोनाबद्दल साहित्यिक म्हणतात.. 

नंदकुमार घोडेले म्हणतात...
पत्रात म्हटले आहे, की महापालिका अधिनियमाच्या कलम १८ (२) नुसार नवीन महापौर, उपमहापौरांची निवड होईपर्यंत विद्यमान महापौर, उपमहापौरांना पदांवर राहता येते. तसेच शासनाने मंगळवारी काढलेल्या आदेशात कोव्हिड-१९ या आजाराच्या पाश्वर्भूमीवर पदाधिकाऱ्यांची अनौपचारिक समिती स्थापन करण्याचे नमूद केले आहे. त्यामुळे कायदेशीर सल्ला घ्या, असे घोडेले यांनी पत्रात म्हटले आहे. गाडी-बंगला प्रशासनाच्या ताब्यात देऊ; मात्र त्याआधी कायदेशीर बाबी प्रशासनाने पडताळून पाहाव्यात. कायदेशीर सल्ला मिळाल्यास आपण एका क्षणात बंगला व गाडी सोडून देऊ, असे घोडेले यांनी सांगितले.