औरंगाबाद: रेल्वे रुळाची तपासणी करताना कुख्यात गुन्हेगारांनी गॅंगमनला रॉडने मारहाण करुन लुटल्याची घटना शुक्रवारी (ता.९) सकाळी सातच्या सुमारास संग्रामनगर रेल्वे रुळावर घडली. विजय चंद्रभान नितनवरे (४२) असे जखमी गॅंगमनचे नाव आहे.

यावेळी दोन लुटारुंनी सोन्याचे पदक आणि चार हजारांची रोकड हिसकावून नेली. कुख्यात गुन्हेगार अमोल गल्हाटे याच्यासह त्याच्या साथीदाराचा पोलिस शोध घेत आहेत. शुक्रवारी सकाळी सातच्या सुमारास विजय नितनवरे हे नेहमीप्रमाणे रेल्वे रुळाची तपासणी करत होते. त्यावेळी तेथे आलेल्या अमोल गल्हाटे व त्याच्या साथीदाराने नितनवरे यांच्याशी काहीवेळ गप्पा मारल्या.

तिघेही बोलत असतानाच अचानक एकाने त्यांच्या डोक्यात रॉड मारला. तर दुसऱ्याने त्यांच्या गळ्यातील सोन्याचे तीन ते चार ग्रॅमचे पदक आणि खिशातील चार हजारांची रोकड हिसकावली. दोघेही पसार झाल्यानंतर नागरिकांनी नितनवरे यांना तात्काळ रुग्णालयात दाखल केले. या घटनेची माहिती मिळताच जवाहरनगर पोलिस ठाण्याच्या सहायक पोलिस निरीक्षक श्रध्दा वायदंडे, विशेष पोलिस अधिकारी तथा सामाजिक कार्यकर्ते श्रीमंत गोर्डे पाटील, रेल्वेचे निरीक्षक अरविंदकुमार शर्मा, सहायक फौजदार दिलीप कांबळे, रेल्वे अभियंता अजितकुमार यांनी भेट दिली. याप्रकरणी जवाहरनगर पोलिस ठाण्यात गुन्हा दाखल करण्यात आला असून, पुढील तपास उपनिरीक्षक शशीकांत तायडे करत आहेत.

मुलगी पाहिली, पसंती झाली, अचानक म्हणे हूंडाच द्या !