छत्रपती संभाजीनगर : सामाजिक न्याय व विशेष साहाय्य विभागामार्फत चालवल्या जाणाऱ्या निवासी शाळांनी दहावी परीक्षेत निकालाची परंपरा कायम ठेवली आहे. छत्रपती संभाजीनगर विभागामध्ये एकूण ११ शासकीय निवासी शाळा कार्यरत आहेत. छत्रपती संभाजीनगर जिल्ह्यामध्ये १, जालना आणि बीड जिल्ह्यात प्रत्येकी ३, तर परभणी जिल्ह्यामध्ये ४ शासकीय निवासी शाळा कार्यरत असून त्यापैकी ७ शाळांचा दहावीचा निकाल १०० टक्के लागला असल्याची माहिती प्रादेशिक उपायुक्त जयश्री सोनकवडे यांनी दिली.

जालना, बीड जिल्ह्यातील तिन्ही, परभणी जिल्ह्यातील एका शाळेचा निकाल शंभर टक्के लागला आहे. याबद्दल विभागातील सर्व शासकीय निवासी शाळेतील मुख्याध्यापक, शिक्षक, विद्यार्थी, कर्मचाऱ्यांचे जिल्ह्याचे सहायक आयुक्त, समाजकल्याण सचिव सुमंत भांगे, आयुक्त ओमप्रकाश बकोरिया, प्रादेशिक उपायुक्त जयश्री सोनकवडे आदींनी अभिनंदन केले आहे.

दहा गुणवत्ताधारक

विभागातील दहा विद्यार्थ्यांनी ९० टक्क्यांपेक्षा जास्त गुण मिळवले आहेत. त्यात भोकरदन (जि. जालना) येथील जीवन सुरडकर याने ९३.२० टक्के आणि धम्मपाल सुरडकर याने ९१.४० टक्के गुण मिळवले आहेत. शिरूर कासार (जि. बीड) येथील सर्वात जास्त ५ विद्यार्थ्यांनी ९० टक्क्यांपेक्षा जास्त गुण मिळवले आहेत. त्यात शिवनाथ राजगुरू (९४.६०), गौरव वाघुंबरे (९४), प्रेम पारवे (९३.२०), आर्यन त्रिभुवन (९३.२०), सुखदेव नवखंडे (९१.४०) यांचा सामावेश आहे. पाटोदा (जि. बीड) येथील प्रज्ञा अंकुश मोरे या विद्यार्थिनीला ९२.२० टक्के गुण मिळाले. परळी वैजनाथ (जि. बीड) येथील अभिजित केदारे यास ९३ टक्के, तर सुशांत कसबे यास ९१ टक्के गुण मिळाले आहेत.