वाळूजमहानगर : ट्रकच्या केबिनचा चक्काचूर झालेला...तिथं बसायलाही पुरेशी जागा उरली नाही...तरी पठ्ठ्याची वाहन चालविण्याची खुमखुमी काही कमी झाली नाही. तशाच स्थितीत ‘तो’ ट्रक दामटतच राहिला. रस्त्याने येणाऱ्या-जाणाऱ्यांचे त्याच्याकडे लक्ष जातच होते; पण आरटीओच काय, तर पोलिसांना मात्र ‘तो’ दिसत नव्हता.

केबिनचा सांगाडाच उरलेला असूनही अत्यंत जोखमीचा प्रवास करणारा हा ट्रक चालक पाहून चालक धोक्यात की ट्रक धोक्यात की अवघ्या रस्त्यावरचे धोक्यात असा तिहेरी प्रश्न अनेकांना पडल्याशिवाय राहिला नाही. कोणीही न हटकल्याने ‘तो’ सरळ पोलीस ठाण्यासमोरून बिनधास्त निघूनही गेला!

पंढरपूरकडून वाळूजमार्गे गंगापूरच्या दिशेने मंगळवारी (ता.२७) सायंकाळी साडेचारच्या सुमारास एक मालवाहतूक करणारा ट्रक गेला. कंटेनरवजा असलेल्या या ट्रकच्या केबिनचा संपूर्ण चक्काचूर झालेला होता. त्यामुळे समोर फक्त ट्रक चालवताना चालकच दिसत होता. त्याचा हा प्रवास अत्यंत धोकादायक व अपघातास कारणीभूत ठरणारा होता. असे असूनही हा ट्रकचालक बिनदिक्कतपणे छत्रपती संभाजीनगर ते पुणे महामार्गावरून गंगापूरच्या दिशेने सुसाट निघून गेला.

एरवी ‘सीट बेल्ट’ नसला, की पोलिसांची ‘नजर’ काचेतून आत घुसून बरोब्बर त्या वाहनाच्या चालकाला थांबण्याचा इशारा करते. नंबर प्लेट नसली की हातवारे करून वा शिट्ट्या वाजवून पोलिस बांधव वाहने थांबवतात. एवढेच नव्हे, तर वाहतुकीचा लहानात लहान नियम लावून वाहनधारकांना दंड भरण्यास सांगतात आणि ते योग्यही आहे. नियम मोडणाऱ्यांवर कारवाई व्हायलाच हवी.

मात्र, मंगळवारी अत्यंत धोकादायक स्थितीत गेलेल्या ट्रकचा चालक तर नियम मोडणाऱ्यांचाही ‘बादशहा’ होता. याकडे ना आरटीओचे, ना वाहतूक शाखेचे किंवा ना स्थानिक पोलिसांचे लक्ष गेले. काहीजण तर वाहने थांबवून त्या ट्रककडे ‘डोळे भरून’ पाहत होते. मात्र, ‘तो’ कोण? कुठला? होता, त्याने असा प्रकार का केला? त्याला कुणाची भिती वाटली नाही का? स्वतःची तसेच इतरांच्या जिवाचीही पर्वा त्याने का केली नाही? हे सारे प्रश्‍न अनुत्तरीत ठेऊनच तो सुसाट अन् बिनधास्त निघून गेला!