छत्रपती संभाजीनगर : केंद्र सरकारच्या नगर वन योजनेतून महापालिका शहरात डेन्स फॉरेस्ट (घनदाट वृक्ष लागवड प्रकल्प) तयार केले जाणार आहेत. मात्र, योजनेतील अटीशर्तीनुसार जागेची अडचण लक्षात घेता जागांचा शोध सुरू आहे. शहरालगतच्या डोंगर रांगांमुळे नैसर्गिक सौंदर्य लाभले आहे. या परिसरात हे डेन्स फॉरेस्ट (घनदाट वन क्षेत्र) विकसित होऊ शकते का, याविषयी चाचपणी सुरू आहे.

वृक्षतोडीमुळे शहरावरचे ग्रीन कव्हर कमी होत आहे. याचा परिणाम पर्यावरणावर होत आहे. तापमानात वाढ होत आहे. यासाठी वृक्ष लागवडीवर भर देण्यात येत आहे. त्यासाठी शहरात हरित पट्टे विकसित करण्यात आले आहेत. तसेच उद्यानातही वृक्ष लागवडीवर भर देण्यात आला आहे.

दरम्यान, शासनाने सुरू केलेल्या नगर वन उद्यान योजनेचीही महापालिका प्रशासनाने अंमलबजावणी करण्याचा निर्णय घेतला आहे. महापालिकेचे प्रशासक तथा आयुक्त डॉ. अभिजित चौधरी यांनी सांगितले की, ही योजना राबविण्यासाठी तिच्या नियमावलींचे पालन करणे आवश्यक आहे.

त्यानुसार महापालिका उद्यान विभागाद्वारे नगर वन योजनेसाठी शहरात जागेचा शोध सुरू आहे. तथापि, शहराच्या मध्यवर्ती भागात जागा उपलब्ध नसल्याने शहरालगतच्या वसाहतींमध्ये जागेचा शोध घेण्यात येत आहे. यात उपलब्ध असलेल्या जागेत योजनेतून घनदाट वृक्ष लागवड करून त्याचे संवर्धन केले जाणार आहे.