सिल्लोड - अज्ञात चोरट्यांनी शहरालगतच्या भराडी रस्त्यावरील रामा पार्क परिसरातील तीन कुलूपबंद घरांना लक्ष करीत लाखोंचे सोने, चांदीच्या दागिन्यांवर डल्ला मारला. ही घटना गुरुवारी (ता.१७) सकाळी उघडकीस आली. याप्रकरणी गुरुवारी रात्री अज्ञात चोरट्यांच्या विरोधात सिल्लोड शहर पोलिस ठाण्यात गुन्हा दाखल करण्यात आला.

मिळालेल्या माहितीनुसार संदीप एकनाथ चंद्रे (रा.रामापार्क, सिल्लोड) यांनी दाखल केलेल्या तक्रारीत नमुद केले की, १० ऑगस्ट रोजी सासऱ्याचे निधन झाल्याने ते कुटुंबीयांसह सावखेडा (ता.सिल्लोड) येथे गेले होते. गुरुवारी (ता.१७) शेजाऱ्यांनी फोन करून घटनेची माहिती दिली. सिल्लोड येथे आल्यानंतर पोलिसांनी माहिती दिली.

सिल्लोड शहर पोलिस ठाण्याचे पोलिस उपनिरीक्षक बी. व्ही. झिंजुर्डे सहकाऱ्यांसह घटनास्थळी दाखल झाले. यावेळी घराची पाहणी केली असता चोरट्यांनी कपाट तोडून दागिणे लंपास केल्याचे दिसून आले.

याच पद्धतीने परिसरातील गणेश परदेसी (रा.सावखेडा (ता.पाचोरा) यांचे रामापार्क परिसरातील घराचे कुलूप तोडून दागिणे लंपास केल्याचे निष्पन्न झाले. त्याचबरोबर सुनील चौधर यांनी देखिल घराचे कुलूप तोडून चोरट्यांनी ३२ ग्रामचा पोहेहार, ७ ग्राम सोन्याची अंगठी, ५ ग्राम अंगठीसह रोख रक्कम घेऊन चोरटे पसार झाले.