औरंगाबाद : लॉकडाउन असतानाही वारंवार सांगूनही लोक रस्त्यावर येत आहेत. त्यामुळे दोन दिवसांपासून पोलिस आणि जिल्हा प्रशासनावर टीकेची झोड उठली आहे. तसेच लोकप्रतिनिधींनीही प्रशासन कठोर भूमिका घेत नसल्याची खंत व्यक्त केली. यानंतर आता बुधवारपासून (ता.२९) सकाळी अकरापर्यंतच जीवनावश्‍यक वस्तूंची खरेदी-विक्री करता येणार आहे. सकाळी ११ ते रात्री ११ वाजतापर्यंत कडक लॉकडाउन असणार आहे. या काळात केवळ औषधी दुकानेच उघडी असतील, असे आदेश पोलिस आयुक्त चिरंजीव प्रसाद यांनी दिले आहेत.

हेही वाचा : कर्तव्य निभावताना हवे जबाबदारीचे भान   

या आदेशाचे उल्लंघन करून कुणी जर बाहेर पडत असेल तर त्याच्यावर कडक कारवाई केली जाणार नाही. शहरात कोरोनाबाधित रुग्णांची संख्या १०५ पर्यंत पोचली आहे. हॉटस्पॉटच्या संख्येतही वाढ झाल्याने जिल्हा, महापालिका व पोलिस प्रशासनासमोर मोठे आव्हान उभे आहे. संचारबंदी, जमावबंदी घोषित करून महिना लोटला तरीही त्याची कठोर अंमलबजावणी झाली नाही. लोक खुलेआम फिरत असल्याने कुठलेही नियम पाळत नसल्यानेच शहरात शंभरच्या पुढे कोरोनाचे रुग्ण पोचले आहेत.

हेही वाचा : कोरोनाबद्दल साहित्यिक म्हणतात.. 

पोलिस, महापालिका आणि जिल्हा प्रशासनाने घेतलेली नरमाईची भूमिकाच यास कारणीभूत आहे, असा आरोप सुज्ञ नागरिक करीत आहेत. शिवाय याबाबत सोशल मीडियातून चौफर टीकाही करण्यात येत आहे. खासदार इम्तियाज जलील यांच्यासह लोकप्रतिनिधींनीही विभागीय आयुक्त सुनील केंद्रेकर यांची भेट घेऊन कडक लॉकडाउन करण्याबाबत मागणी केली. 

हेही वाचा : बोंबाबोंब झाल्यानंतर आली प्रशासनाला जाग

सकाळी अकरापूर्वीच करा खरेदी 
ता. २९ एप्रिल ते तीन मेपर्यंत लॉकडाउन व संचारबंदी जास्त कडक करण्याचा निर्णय घेतला असल्याचे आदेश संबंधित यंत्रणेला दिले आहेत. जीवनावश्यक वस्तू किंवा इफ्तारसाठीची फळे आता सकाळी अकराच्या अगोदरच खरेदी करावी, अशी माहिती पोलिस आयुक्तांनी दिली आहे. आदेशाचे उल्लंघन करणाऱ्यांवर कडक कायदेशीर कारवाई करण्यात येईल, असा इशाराही त्यांनी दिला आहे.