वाळूज (जि.औरंगाबाद) : भांगशी मातेचे दर्शन घेऊन घराकडे जात असताना रस्त्यात नितळछाक पाणी पाहून अंघोळीचा मोह आवरता न आल्याने पाण्यात उतरलेल्या तिघांपैकी दोघांचा बुडून मृत्यू झाला. तर एक जण सुदैवाने कसातरी बचावला. ही दुर्दैवी घटना रविवारी (ता.दहा) सायंकाळी घडली. वाळूज औद्योगिक (Waluj MIDC) परिसरातील रांजणगाव (शेणपुंजी) येथील कृष्णानगरात स्टरलाइट कंपनीचा कामगार प्रल्हाद रामा चव्‍हाण (वय 24) व बाळू अण्णा पालवे असे कुटुंबासह राहतात. पालवे यांच्याकडे दोन दिवसांपूर्वी त्याचा साला नितीन रमेश गुंडाळे (19, रा. जळगाव घाट, ता. कन्नड) हा आला होता. रविवारी नितीन रमेश गुंडाळे, प्रल्हाद रामा चव्हाण व बाळू अण्णा पालवे असे तिघे (Aurangabad) जण भांगशी मातेच्या दर्शनासाठी गेले होते.

दुपारचे जेवणही त्यांनी गडावरच केले. तेथून घरी जात असताना गडाजवळ स्वच्छ पाण्याचे तळे त्यांना दिसले. त्यात अंघोळ करण्याचा मोह त्यांना आवरता आला नाही. त्यामुळे तिघेही पाण्यात अंघोळीसाठी उतरले. मात्र त्यांना पोहता येत नसल्याने तिघेही पाण्यात बुडाले. सुदैवाने बाळू अण्णा पालवे या पाण्यातून कसाबसावर आला. तर नितीन रमेश गुंडाळे व प्रल्हाद रामा चव्हाण हे दोघेही पाण्यात बुडून मृत झाले. अग्निशमन दलाच्या जवानांसह नागरिकांनी मदतकार्य करून त्यांना पाण्यातून बाहेर काढून उपचारार्थ घाटीत दाखल केले असता डॉक्टरांनी तपासून मृत घोषित केले. या घटनेची नोंद दौलताबाद पोलिस ठाण्यात करण्यात आली आहे.