आडूळ (जि.औरंगाबाद ) : आडूळ तांडा (ता.पैठ़ण) येथील एका २८ वर्षीय युवकाने विषारी औषध प्राशन करून आत्महत्या केल्याची घटना गुरूवारी (ता.तीन) सकाळी उघडकीस आली. वामन रोहिदास राठोड असे आत्महत्या करणाऱ्या युवकाचे नाव आहे. वामन राठोड हा युवक बुधवारपासून (ता.दोन) घरातून बेपत्ता होता. आज गुरुवारी सकाळी आडूळ खुर्द शिवारात डोंगराच्या पायथ्याशी असलेल्या एका मंदिराजवळ जाणाऱ्या येणाऱ्या नागरिकांना वामन मृतावस्थेत आढळून आला. त्याच्या मृतदेहाजवळ विषारी औषधाची एक बाटली पाचोड पोलिसांना मिळून आली. वामन हा औरंगाबाद (Aurangabad) येथील शासकीय रुग्णालयात सुरक्षा रक्षक म्हणून कार्यरत होता. (Youth End Himself In Paithan Taluka Of Aurangabad)

मागील बऱ्याच दिवसांपासून तो आपल्या मूळगावाकडे आला होता. त्यानंतर तो पुन्हा आपल्या कर्तव्यावर परतलाच नाही. वामन याच्यावर आज गुरुवारी सायंकाळी शोकाकुल वातावरणात तांड्यावर अंत्यसंस्कार करण्यात आले. त्याच्या पश्चात आई, वडील, पत्नी, एक मुलगी, भाऊ असा परिवार आहे. त्याच्या मृत्यूचे कारण मात्र समजू शकले नाही. सदरील घटनेची नोंद पाचोड पोलिस ठाण्यात घेण्यात आली असून पुढील तपास सहायक पोलीस निरीक्षक गणेश सुरवसे यांच्या मार्गदर्शनाखाली बीट जमादार जगन्नाथ उबाळे हे करित आहेत.