आष्टी (जि. बीड) - चोरीस प्रतिकार करणाऱ्या मुलावर चोरट्याने चाकूचे वार करीत जखमी करून घरातील एक लाख 22 हजारांचे सोन्या-चांदीचे दागिने लंपास केले. तालुक्‍यातील डोईठाण येथील खाडे वस्तीवर शनिवारी (ता. 18) मध्यरात्री हा प्रकार घडला. 

पोलिसांकडून समजलेली माहिती अशी, की तालुक्‍यातील डोईठाण येथील खाडे वस्तीवर राहणाऱ्या द्वारकाबाई विठ्ठल खाडे या पती, दोन मुले व सुनांसह राहतात. शनिवारी रात्री जेवण झाल्यानंतर त्या नवीन घरात सून सोनी, नणंद मखमलबाई आघाव व मुलगा पवन यांच्यासह झोपण्यासाठी आल्या. त्यांचे पती जुन्या घरी थांबले होते. नणंद व सुनेसह त्या एका खोलीत, तर मुलगा पवन हा दुसऱ्या खोलीत झोपला.

हेही - राजकारण थांबवा, विकासाचे काय ते बोला

मध्यरात्री तीनच्या सुमारास खोलीतील लोखंडी दरवाजाचा आवाज आल्याने त्यांना जाग आली. त्यावेळी कपाटाजवळ एक अनोळखी व्यक्ती तोंडाला हातरुमाल बांधलेल्या अवस्थेत सोन्याचे दागिने असलेले पाकीट खिशात घालून निघाल्याचे दिसले. त्याने द्वारकाबाई यांना चाकूचा धाक दाखवून गप्प बसण्यास सांगितले. तो घराबाहेर गेल्यानंतर त्यांनी आरडाओरड केल्यानंतर शेजारच्या खोलीत झोपलेला मुलगा पवन हा घराबाहेर आला. तेव्हा घराच्या पायऱ्यांजवळ बसलेल्या दोन व्यक्तींनी पळत जाऊन दुचाकी सुरू केली.

हेही - पथक आले पण कोणी नाही पाहिले

पवन याने पळत जाऊन दुचाकीला लाथ मारून त्यांना खाली पाडले. त्यावेळी द्वारकाबाई यादेखील तेथे गेल्या. या दोघांनी चोरट्यांना पकडण्याचा प्रयत्न केला. यावेळी पवन व चोरट्यांमध्ये झटापट झाली. यात पवनने दोघा चोरट्यांना मारले व एकाच्या दंडाला चावा घेत दुसऱ्याच्या नाकावर बुक्की मारली. मात्र, यावेळी तिथे आलेल्या तिसऱ्या व्यक्तीने पवनच्या दंड, कपाळ व छातीवर चाकूने सपासप वार करून जखमी केले. यानंतर तिघेही दुचाकीने धामनगावच्या दिशेने पसार झाले.

हेही - एका क्‍लिकवर वाचा औरंगाबादची गुन्हेगारी     

जखमी पवन यास द्वारकाबाई यांनी पती व सुनांच्या मदतीने उपचारासाठी जीपने नगर येथे पाठविल्यानंतर घरात पाहणी केल्यानंतर कपाटातील सोन्याचे दागिने, बाळाचे जोडे, चांदीसह एकूण एक लाख 22 हजार 500 रुपयांचा ऐवज चोरीस गेल्याचे निदर्शनास आले. द्वारकाबाई खाडे यांनी रविवारी (ता. 19) आष्टी पोलिसांत दिलेल्या फिर्यादीवरून तीन चोरट्यांविरुद्ध गुन्हा नोंदविण्यात आला आहे.