बीड : जिल्ह्यात कोरोनाच्या दुसऱ्या लाटेत मागील वर्षीच्या तुलनेत एका दिवसातील रुग्ण बाधितचे प्रमाण आता २५ टक्क्यांच्या घरात गेले आहे. पहिल्या लाटेत सप्टेंबर २०२० महिन्यात एका दिवसात असलेली ॲक्टिव्ह रुग्णसंख्याही आता दुप्पट झाली आहे. असे असले तरी जिल्ह्यातील रुग्णालयात एकूण पाच हजार ९०७ खाटांपैकी दोन हजार ४९४ खाटा शिल्लक आहेत. मागील वर्षी राज्यभरात कोरोनाचा प्रसार वेगाने होत असताना दोन महिने कोरोनाला वेशीवर थोपविण्यात बीड जिल्ह्याला यश आले होते.

मार्च महिन्याच्या सुरुवातीला कोरोनाच्या दुसऱ्या लाटेचे आगमन झाले. त्याचा प्रादुर्भाव झपाट्याने वाढत असून दररोज बाधित रुग्णांची आकडेवारी नवीन उच्चांक गाठत आहे. सुरुवातीला शहरापर्यंत असलेल्या कोरोनाचा प्रसार आता खेड्यापाड्यासह वाडी, वस्ती, तांड्यावरही जाऊन पोहोचला आहे. पहिल्या लाटेपेक्षा दुसऱ्या लाटेतील कोरोनाचा नवीन स्ट्रेन रुग्णांना झपाट्याने बाधित करीत आहे. मागील दोन दिवसांपासून जिल्ह्यात दररोज बाधित रुग्णांची संख्या हजाराच्या वर गेली असून मृत्यू दरही झपाट्याने वाढला आहे. यामुळे जिल्ह्यातील कोविड सेंटर हाउसफुल्ल होत असले तरी अद्याप विविध रुग्णालयांतील दोन हजार ४९४ खाटा शिल्लक आहेत.

मागीलवर्षी कोरोनाच्या पहिल्या लाटेत सप्टेंबर २०२० मध्ये बीड जिल्ह्यात एका दिवसातील सर्वोच्च ॲक्टिव्ह रुग्णसंख्या ही दोन हजार ३० एवढी होती. यावर्षी ही रुग्णसंख्या ६ हजाराच्या घरात गेली आहे. मागील वर्षी एका दिवसात कोरोनाबाधित रुग्णांची सर्वोच्च संख्या ही ४०४ होती तर, दुसऱ्या लाटेत ती एक हजाराच्या वर गेली आहे. जिल्ह्यातील विविध कोविड सेंटरसह खाजगी रुग्णालयांत सध्या तीन हजार ३०० कोरोनाबाधित रुग्णांवर उपचार करण्यात येत असून जवळपास दोन हजार रुग्ण हे होम आयशोलेशनमध्ये आहेत.