गेवराई - मागील काही दिवसांपासून मराठा आरक्षणासंदर्भात अंतरवाली सराटी (ता. अंबड) येथे सुरू असलेल्या उपोषणकर्त्यांस पोलिसांकडून झालेला लाठी हल्ला मराठा आरक्षणास अधिक हिंसक करण्यास कारणीभूत ठरत असून, याचे पडसाद गेवराई तालुक्याच्या गोदा पट्यात जास्त प्रमाणात दिसून येत आहेत. तालुक्यात ठिकठिकाणी आंदोलन करत जाळपोळ होत आहे.

गेवराई तालुक्यातील गुळज येथील शेकडो मराठा बांधवांनी गोदापात्रात जलसमाधी आंदोलन करण्याचा पवित्रा घेतला होता. मात्र, प्रशासनाने तत्काळ घटनास्थळी धाव घेत आंदोलनकर्त्यांची मनधरणी करत प्रशासकीय स्तरावर आपली बाजू मांडण्याची हमी दिल्यानंतर आंदोलनकर्ते तब्बल दीड तासाने गोदापात्रातून बाहेर आले.

तर, तालुक्यातील निपाणी जवळका येथील आंदोलनकर्त्यांनी मुख्यमंत्री, उपमुख्यमंत्री यांच्या प्रतिकात्मक पुतळ्याची अंत्ययात्रा काढून पुतळे जाळून टाकले.

मागील काही दिवसांपासून अंतरवाली सराटी (ता.अंबड) येथे मराठा आरक्षणासाठी सुरू असलेल्या उपोषणास हिंसक वळण लागल्यानंतर महाराष्ट्रातील मराठा समाज अधिकच आक्रमक झाल्याचे पाहावयास मिळत आहे. यामुळे तालुक्यात ठिकठिकाणी बंद पुकारून आंदोलनास पाठिंबा देण्यात येत असून, काही ठिकाणी जाळपोळ होत आहे. गेवराई तालुक्यातील गोदाकाठाच्या पट्ट्यात या आंदोलनाची धग अधिक दिसून येत आहे.

दाकाठच्या गुळज गावात मुक्कामी असणारी बस आंदोलनकर्त्यांनी जाळून टाकली तर धोंडराई फाटा येथे देखील बस जाळून टाकण्यात आली. अजून ही आंदोलक थांबले नसून ठिकठिकाणी मराठा समाज आंदोलन करत पाठिंबा दर्शवत असल्याचे दिसून येत आहे. गुळज व पंचक्रोशीतील शेकडो मराठा समाज बांधव रविवारी सकाळी थेट गुळज येथील नदीपात्रामध्ये जलसमाधी आंदोलन करण्यास उतरले. याची माहिती प्रशासनाला मिळताच घटनास्थळी मोठा पोलिसांचा फौजफाटा दाखल झाला.

यावेळी आंदोलनकर्त्यांनी आक्रमक भूमिका घेत मराठा आरक्षण मिळेपर्यंत जलसमाधी आंदोलन करण्याचा इशारा दिला असता याठिकाणी बीडचे अधिकारी व गेवराईचे तहसीलदार संदीप खोमणे यांनी धाव घेत आंदोलनकर्त्यांसोबत चर्चा करत प्रशासनाला सहकार्य करण्याची विनंती केली. यावेळी प्रशासनाची धावपळ झाल्याचे दिसून आले.

पोलिस प्रशासन सकाळीच गावात

पोलिस प्रशासन सकाळीच गुळज गावात दाखल झाले होते. यावेळी अग्निशामक दल, राज्य राखीव दलाची तुकडी, दंगल नियंत्रण पथक यासह रुग्णवाहिका याठिकाणी दाखल होती. तालुक्यातील निपाणी जवळका येथील मराठा समाज देखील आक्रमक झाल्याचे पाहावयास मिळाले. येथील आंदोलनकर्त्यांनी मुख्यमंत्री, उपमुख्यमंत्री यांच्या प्रतिकात्मक पुतळ्याची अंत्ययात्रा काढून निषेध व्यक्त करून पुतळे जाळून टाकले.