वसमत ( जिल्हा हिंगोली ) : पंतप्रधान नरेंद्र मोदी यांच्या नेतृत्वाखालील भारतीय जनता पक्षाच्या केंद्र सरकारला ता. ३० मे रोजी सात वर्षे पूर्ण होत असून त्या दिवशी भाजप हिंगोली जिल्ह्यामधील १५० गावांमध्ये कोरोनासंबधी सेवाकार्य करणार आहे. अशी माहिती जिल्हाध्यक्ष ॲड. शिवाजी जाधव यांनी दिली. कोरोनाच्या दुसऱ्या लाटेमुळे निर्माण झालेली स्थिती ध्यानात घेता कोणताही उत्सव होणार नाही, असेही ते म्हणाले.

जिल्हाध्यक्ष ॲड. जाधव यांनी सांगितले की, हिंगोली जिल्ह्यातील १५० गावांमध्ये ता. ३० मे रोजी भाजपचे कार्यकर्ते भेट देतील. त्या गावांमधील आशा सेविका आणि कोरोनाच्या साथीचा सामना करणाऱ्या कोरोना योद्ध्यांचा पक्षातर्फे सत्कार करण्यात येईल. गावामध्ये भाजपाचे कार्यकर्ते कोरोनासंबंधी सेवाकार्य करतील. त्यामध्ये आमदार तानाजी मुटकुळे, माजी आमदार गजानन घुगे, माजी आमदार रामराव वडकुते, बाबाराव बांगर यांचा समावेश असेल.

हेही वाचा - अनुभवाच्या शिदोरीतून मुदखेड शहराचा विकास करणार- प्रशांत पाटील

जिल्ह्यातील भाजपचे सर्व आमदार, नगरसेवक, पक्षाचे पदाधिकारी यांच्यासह सर्व कार्यकर्ते सेवाकार्यात सहभागी होतील. पक्षातर्फे कोरोनाच्या संकटात सातत्याने सेवाकार्य चालू आहे. पक्षातर्फे ३० मे चा दिवसही विशेष सेवाकार्य करुन साजरा करण्यात येणार आहे. कोरोनासंबंधी सर्व नियमांचे पालन करुन आणि प्रशासनाला सहकार्य करुन हा उपक्रम होईल.

भाजपाच्या युवा मोर्चा, महिला मोर्चा, किसान मोर्चा अशा सर्व मोर्चांचे कार्यकर्ते ता. ३० रोजी रक्तदान शिबीरांचे आयोजन करणार आहेत. तसेच जिल्ह्यातील हिंगोली, वसमत, कळमनुरी, औंढा, सेनगाव या शहरांमधील सेवावस्त्यांमध्ये विशेष सेवाकार्य करण्यात येईल.

संपादन- प्रल्हाद कांबळे