तुळजापूर (जि.उस्मानाबाद) - तुळजाभवानी मंदिर उघडावे, या मागणीसाठी सोमवारी (ता.३०) तुळजाभवानी मंदिरासमोर काळी गुढी उभारून शंखनाद आंदोलन पावसात दुपारी बारा वाजण्याच्या सुमारास करण्यात आले. तुळजाभवानी मंदिर उघडावे या मागणीसाठी महाद्वारासमोर शंखनाद भारतीय जनता पक्षाच्या वतीने आंदोलन करण्यात आले. यावेळी ठाकरे सरकार मालामाल, मंदिर बंद, उघडले बार, उद्धवा धुंद तुझे सरकार अशी टीका यावेळी करण्यात आली. यावेळी आमदार राणाजगजितसिंह पाटील, नगराध्यक्ष सचिन रोचकरी, भाजपचे तालुकाध्यक्ष संतोष बोबडे, भारतीय जनता युवा मोर्चाचे जिल्हाध्यक्ष राजसिंह निंबाळकर यांच्या प्रमुख उपस्थितीत आंदोलन करण्यात आले. यावेळी आमदार पाटील यांनी राज्य सरकारवर टीका केली. ते म्हणाले की, सरकार केवळ जेथे महसूल मिळतो तेच उद्योगधंदे चालू ठेवत आहेत.

त्यासाठी यांना बार, बस, रेल्वे, हॉटेल आदी ठिकाणे उघडी करता येते. पण मंदिर का उघडता येते नाही. तुम्हाला जर मंदिर उघडायचे नसेल तर ज्यांची उपजीविका मंदिरावर आहे. त्यांना अर्थसाह्य करावे, अशी मागणी त्यांनी केली. यावेळी महिला आघाडीच्या विद्या माने, देवकन्या गाडे, जिल्हा चिटणीस गुलचंद व्यवहारे, आनंद कंदले, नारायण ननवरे, दत्ता राजमाने, विकास मलबा, बाळासाहेब शामराज, शिवाजी बोधले, प्रसाद पानपुडे, गिरीश देवळालकर, उमेश गवते, सागर कदम, सागर पारडे आदी उपस्थित होते. यावेळी राजाभाऊ गायकवाड यांनी संबळ वाजविले. या आंदोलनासंदर्भात पोलिसांनी आंदोलन केवळ पंधरा मिनिटे झाले असे सांगितले.