हिंगोली ः दोन पिशव्यांत पुस्‍तके विक्रीसाठी नेऊन व्यवसाय सुरू केल्यानंतर एक व्हॅन खरेदी करून फिरता स्‍टॉल उभारला. अनेक शहरात त्‍यांची विक्री सुरू केल्याने नफ्यामधून घरचा प्रपंच चालविला जात आहे. दोन बॅगमध्ये बसतील एवेढी पुस्‍तके विकता विकता आता व्हॅनमधून त्‍याची विक्री केली जाते. यामुळे शिक्षणाची प्रक्रिया निरंतर सुरू ठेवण्याचा प्रयत्‍न केला जातो.

पुसद तालुक्‍यातील रोहडा येथील रामेश्वर वाठ हे हिंगोली शहरातील विविध शासकीय कार्यालये व मुख्य रस्‍त्‍यावर सावलीच्या ठिकणी फिरते बुक स्‍टॉल उभारून पुस्‍तकांची विक्री करीत आहेत. श्री. वाठ हे पदवीधर असून त्‍यांनी यापूर्वी एका बुक स्‍टॉलवर पुसद येथे नोकरी केली. घरची परिस्‍थिती बेताचीच असल्याने पुस्‍तक व्रिकीचे काम सुरू केले.

हेही वाचा - लातूरकर रोहित इंडियन आयडॉलमध्ये दुसरा; म्हणाला, ट्रॉफीपेक्षा मने जिंकली !

पुस्‍तक विक्रेत्यांच्या ओळखी
येथे काम करीत असताना स्‍टॉलसाठी लागणारे पुस्‍तक खरेदीसाठी औरंगाबाद, पुणे, मुंबई, शहरात नामवंत प्रकाशनाची पुस्‍तके घेण्यासाठी त्याने जावे लागत होते. या स्‍टॉलवर येण्या-जाण्यामुळे त्यांच्या विविध नामवंत शहरातील पुस्‍तक विक्रेत्यांच्या ओळखी झाल्या, त्‍यामुळे काही दिवस या दुकानावर काम करून कामाचा अनुभव घेतला व स्‍वतंत्र बुक स्‍टॉल उभारण्याचा निर्णय घेतला. हनुमान बुक सेंटर नावाने पुस्‍तक विक्रीचे स्‍टॉल सुरू केले. हातावर हात ठेवून बसायचे नाही, असा विचार करून पुस्‍तक घेऊन मोठ्या शहरात जाण्याचे ठरविले. त्‍याप्रमाणे पिशवीत भरून शासकीय कार्यालये, चौकात बसून त्‍याचे स्‍टॉल उभारून त्‍याची विक्री करणे सुरू केले.

हेही वाचा - नांदेड विभागात २२ लाख टन उसाचे गाळप

ग्राहकांना दहा ते पंधरा टक्‍के खरेदीवर सूट
हळुहळू बाजारात जम बसत गेला व आता इतरही शहरात पुस्‍तके घेऊन जाण्याचा निर्णय घेतला. मागच्या काही वर्षांपासून यवतमाळ जिल्‍ह्यासह बुलडाणा, वाशीम व आता हिंगोली जिल्‍ह्यात फिरते स्‍टॉल सुरू केले आहेत. ग्राहकांना दहा ते पंधरा टक्‍के सूट दिली जाते. यामुळे विक्री अधिक होते. त्‍यांच्या स्‍टॉलवर शैक्षणिक, स्‍पर्धा परीक्षा, कायदेविषयक, चालू घडामोडी, शेतीविषयक, राजकीय, समाजिक, थोरांची आत्‍मचरित्रे यासह कादंबरी, कथा आदी प्रकारची पुस्‍तके आहेत. ही पुस्‍तके वाहनात ठेवून गावोगाव मुख्य रस्‍त्‍यावर स्‍टॉल उभारून त्‍याची विक्री केली जात आहे. एकदा घराच्या बाहेर पडल्यावर पधंरा दिवस किमान घरी परत जाता येत नाही. मात्र, संसार सुरळीत सुरू असल्याचे समाधान मिळते.

खर्च वजा जाता घरचा प्रपंच चालतो
दोन बॅगमध्ये पाठीवर पुस्‍तके विकता विकता आज व्हॅनमधून फिरता स्‍टॉल उभारून त्‍याची विक्री केली जाते. वाचनाची निरंतर प्रक्रिया सुरू राहावी यासाठी सूटही देतो. यामुळे खर्च वजा जाता घरचा प्रपंच चालतो, यातच समाधानी आहे. - रामेश्वर वाठ, पुस्तक विक्रेता.