नांदेड : मुरूम व गीट्टी वाहतुक करण्यासाठी टीप्परला परवानगी देतो म्हणणारा पोलिस हवालदार चार हजाराच्या लाचप्रकरणी एसीबीच्या जाळ्यात अडकला. त्याने टीप्पर चालकाकडून चार हजार रुपये घेण्याचे निष्पन्न झाल्याने त्याच्यावर नांदेड ग्रामिण पोलिस ठाण्यात गुन्हा दाखल करण्यात आला आहे. ही कारवाई लाचलुचपत प्रतिबंधक विभागाने सोमवारी (ता. १३) जानेवारी रोजी केली. 
नांदेड ग्रामिण पोलिस ठाण्याच्या हद्दीतून गीट्टी व मुरूम वाहतुक करणाऱ्या टीप्परला परवानगी देतो असे म्हणून नांदेड ग्रामिणचा हवालदार नामदेव नागोराव ढगे यांनी प्रति टीप्परमागे तिन हजार असे चार टीप्परचे १२ हजार रुपयाची लाच मागितली. मात्र तडजोडीअंती चार हजार रुपये देण्याचे ठरले. 

येथे क्लीक करा - कायद्याचे अज्ञान हा गुन्हेगारीमधून सुटण्याचा मार्ग नाही- न्या. धोळकिया

लाचेची मागणी पडताळणीत निष्पन्न

परंतु ही लाच देण्या इच्छा नसलेल्या तक्रारदाराने रविवारी (ता. १२) लाचलुचपत प्रतिबंधक विभागात येऊन लाच मागणाऱ्या हवालदाराविरुद्ध तक्रार दिली. या तक्रारीवरून पोलिस उपाधीक्षक विजय डोंगरे यांच्या मार्गदर्शनाखाली पोलिस निरीक्षक शेषेराव नितनवरे यांच्या पथकानी शासकिय पंचासमक्ष केलेल्या लाच पडताळणी सापळ्यात हवालदाराने चार हजाराची लाच मागितल्याचे निष्पन्न झाले. यावरून पोलिस निरीक्षक श्री. नितनवरे यांनी सोमवारी (ता. १३) दुपारी नांदेड ग्रामिण पोलिस ठाण्यात दिलेल्या फिर्यादीवरुन नामदेव ढगेविरुध्द कलम ७ भ्रष्टाचार प्रतिबंधक अधिनियम (संशोधन) - २०१८ नुसार गुन्हा दाखल करण्यात आला आहे. तपास श्री. नितनवरे करीत आहेत. 

हेही वाचा - ‘ढवारा’ जपत होता ऋणानुबंध : काय आहे ढवारा ते वाचा

यांनी घेतले परिश्रम

हा सापळा यशस्वी करण्यासाठी पोलिस अधीक्षक कल्पना बारवकर, अतिरिक्त पोलिस अधीक्षक अर्चना पाटील, पोलिस उपाधीक्षक विजय डोंगरे यांच्या मार्गदर्शनाखाली पोलिस निरीक्षक शेषेराव नितनवरे, पोलिस नाईक हनमंत बोरकर, किशन चिंतोरे, गणेश केजकर, अमरजितसिंग चौधरी आणि मारोती सोनटक्के यांनी परिश्रम घेतले. 
  
नागरिकांना आवाहन

जिल्ह्यातील सर्व नागरिकांना आवाहन करण्यात येते की, शासकिय अधिकारी किंवा कर्मचारी हे शासकिय काम करण्यासाठी लाचेची मागणी करीत असतील किंवा लाचेच्या मागणीचे मोबाईल फोनवर लोकसेवक  यांचे एसएमएस, व्हिडीओ आणि आॅडीओ क्लीप असल्यास भ्रष्टाचार संबंधाने काही माहिती असल्यास आमच्याशी संपर्क साधावा. तसेच माहिती अधिकारात शासकिय अधिकारी किंवा कर्मचारी यांनी शासकिय निधीचा भ्रष्टाचार केला असेल तर टोलफ्री हेल्पनाईन क्रमांक- १०६४ व कार्यालयाचा फोन क्रमांक ०२४६२- २५३५१२ यावर किंवा पोलिस उपाधिक्षक विजय डोंगरे यांचा चळभा, क्रमांक ८९७५७६९९१८ या क्रमांकावर संपर्क साधावे.