नांदेड : कोरोना या संसर्गजन्य आजाराने देशातील सर्वच व्यवसायांवर संकट कोसळले आहे. यात कामगारांचे चांगलेच हाल होत आहे. तर मातीत सोनं पिकविणाऱ्या शेतकऱ्यांवर पिकविलेला माल मातीमोल भावाने विकण्याची वेळ आली आहे.

सध्याच्या काळात लग्न म्हटल की नवरी मुलीच्या घरच्यांकडून चांगल्याच अपेक्षा वाढल्या आहेत. यात मुलगा नोकरीवाला पाहिजे. नुसता नोकरीवाला नाही, तर सरकारी नोकरीवालाच पाहिजे, अशा अपेक्षा नवरी मुलीच्या घरच्यांकडून ऐकावयास मिळत आहेत. शेतकरी, कामगार मुलगा तर त्यांना नकोच असल्याचे चित्र आहे.

हेही वाचा - Video-लॉकडाउन : नागरिकांचे प्रयत्न आले फळाला, कसे? ते वाचलेच पाहिजे

शेवटी समाधान म्हणून मोठ्या शहरांमध्ये चांगल्या कंपनीत नोकरी असणाऱ्या मुलाला शेवटचा पर्याय म्हणून निवडले जात आहे. यामुळे मुलासाठी मुलगी शोधण्यासाठी मुलांच्या मंडळींना नाकीनऊ येत आहे. त्यातच मुलींच्या मंडळींची समाधानी म्हणा किंवा लग्न होईपर्यंतच का होईना म्हणून अनेकजण मोठ्या शहरांमध्ये जाऊन कंपन्यांमध्ये काम करीत आहेत. 

‘लग्नाचा विषय सोड रं भाऊ’
मात्र, सध्या कोरोनाच्या पार्श्‍वभूमीवर सर्वत्र लॉकडाउन करण्यात आले आहे. परिणामी, शहरातील कंपन्या सुरू ठेवण्यास बंधन घालण्यात आले आहे. त्यामुळे या ठिकाणी काम करणारे कामगार आपापल्या गावी परतले आहेत. काहीजण वाहतुक बंद असल्याने आहे तेथेच अडकून पडलेले आहेत.  त्यांना आता आपण मुलगी पाहण्यासाठी गेल्यावर सांगावे तरी काय? असा प्रश्‍न पडला आहे. त्यामुळे या वर्षी तरी मी नवरदेव होणार ! असे म्हणणाऱ्यांची आशा मावळली असून त्यांच्यावर ‘लग्नाचा विषय सोड रं भाऊ’, असे म्हणण्याची वेळ आली आहे.   

येथे क्लिक करा - Video - लॉकडाउन : स्ट्रेस कमी करण्यासाठी तज्ज्ञ सांगतात...

वधू पालकांनाही पडला पेच  
नेहमी मुलीसाठी पुणे, मुंबईसारख्या शहरांमध्ये नोकरीला असलेला मुलगा पाहिजे, असे म्हणणाऱ्यांनाही आता चांगलाच पेच पडला आहे. सरकारी नोकरीवाला मुलगा सर्वच मुलींना मिळणे शक्य नाही. त्यासाठी खासगी कंपन्यांत काम करणाऱ्या मुलाचा पर्याय शेधणाऱ्या मुलीच्या मंडळीला आता हाही पर्याय अडचणीचा ठरणार की काय, असे वाटत आहे. कारण, सध्या गावाकडे आलेल्या या मुलांना पुन्हा कंपनीत काम मिळेल की नाही? हा मोठा प्रश्‍न त्यांच्यासमोर पडला आहे.