नवीन नांदेड : `बि.एच.एम.सी.टी’ या अखिल भारतीय तंत्रशिक्षण परिषद मान्यता प्राप्त चार वर्षाचा अभ्यासक्रमानंतर १०० टक्के नोकरीच्या संधी उपलब्ध आहेत. किमान ३० हजारापेक्षा अधिक मासिक पगाराची शाश्वती देणारा हा अभ्यासक्रम असून, इतर व्यावसायिक अभ्यासक्रमाच्या तुलनेने सोपा देखील आहे. कारण या अभ्यासक्रमात थेअरीपेक्षा प्रात्यक्षिकांवर अधिक भर असतो.

असे आहे अभ्यासक्रमाचे वैशिष्ट्य
हॉटेल व्यवस्थापनात कूक, असिस्टंट मॅनेजर, डेप्युटी हॉटेल मॅनेजर, हाऊसकिपींग मॅनेजर, रेस्टोरंट व किचेन सुपरवायझर, फ्रंट ऑफिस, एअरलाईन्स, फूड सर्विस प्रोवाइडर, कार्पोरेट कँटीन मॅनेजर, मॉल्स, रेल्वे, शिपिंग मध्ये किचन कॅन्सल्टंट, फास्टफूड क्षेत्रात नोकरीची अनेक दालने केवळ भारतातच नव्हे तर परदेशातही उपलब्ध आहेत. तसेच अनेक शासन अंगीकृत संस्था महाराष्ट्र टुरिझम डिव्हलोपमेंट कार्पोरेशन व इंडियन टुरिझम डिव्होलपमेंट कार्पोरेशन, रेल्वे, शिपिंग या आस्थापनातही मोठ्या प्रमाणात नोकरीच्या संधी विद्यार्थ्यांना उपलब्ध आहेत. हा अभ्यासक्रम पूर्ण करणारांना परदेशातही मागणी आहे.

हेही तुम्ही वाचाच - अर्थसंकल्पात मराठवाड्याला काय काय मिळाले, वाचा

मराठवाड्यात ‘ए.आय.सी.टी.इ.’ मान्यताप्राप्त ‘बि.एच.एम.सी.टी.’ हा अभ्यासक्रम केवळ ग्रामीण तंत्रनिकेतन, विष्णुपुरी नांदेड या संस्थेत राबवला जातो. गंमत म्हणजे या अभ्यासक्रमास कला, विज्ञान वाणिज्य, एम सी व्ही सी अशा कोणत्याही शाखेतील १२ वी उत्तीर्ण विद्यार्थी पात्र ठरतो. या अभ्यासक्रमाच्या प्रवेशासाठी MAH-BHMCT-CET २०२० हि प्रवेशपूर्व पात्रता परीक्षा उत्तीर्ण होणे बंधनकारक असते.  शैक्षणिक वर्ष २०२०-२१ करिता प्रवेश पूर्व परीक्षा दिनांक १० मे २०२० रोजी होणार असून त्याकरिता २८ मार्च पर्यंत ऑनलाईन प्रवेश अर्ज स्वीकारले जाणार आहेत.

अशी होते प्रवेशप्रक्रिया
‘बि.एच.एम.सी.टी.’ प्रवेशासाठी १०० गुणांची कॉमन एंट्रन्स टेस्ट घेतली जाते. ती इंग्रजी माध्यमातून वस्तुनिष्ठ बहुपर्यायी प्रश्नावर आधारित असते. प्रत्येक प्रश्नास एक गुण असतो तर चुकीच्या उत्तरास नकारात्मक पद्धतीने गुण कमी केले जातात. इंग्रजी व्याकरण व विषयावर आधारित ४० गुण, सामान्य ज्ञानास अनुसरून ३० गुण, तर बुद्धिमत्तेवर आधारित ३० गुण असे १०० गुणांचे वर्गीकरण या परीक्षेत असते. संबंधित प्रवेश अर्ज भरण्यासाठी विद्यार्थ्यांनी महाराष्ट्र स्टेट कॉमन एंट्रन्स टेस्ट सेलच्या संकेतस्थळावर भेट देणे आवश्यक आहे.

हे देखील वाचलेच पाहिजे - महिला दिन : रेल्वेमधील महिला कर्मचाऱ्यांचे गौरवास्पद कार्य

पूर्व परिक्षेविषयी प्रशिक्षणाची संधी
या अभ्यासक्रमाच्या पूर्व परीक्षेचे अर्ज भरणेसाठी, परीक्षा पद्धती समजावून सांगण्यासाठी पूर्व परीक्षेविषयी १५ दिवसांचे प्रशिक्षण संस्थेतर्फे देण्यात येणार आहे. विद्यार्थ्यांनी या संधीचा लाभ घेऊन आपले उज्वल भवितव्य घडवावे व अधिक माहितीसाठी विभागप्रमुख  गायत्री पाटील यांचेशी संपर्क साधावा.
- प्राचार्य, डॉ. विजय पवार (ग्रामीण तंत्रनिकेतन, विष्णुपुरी, नांदेड)