औरंगाबाद - सातारा परिसरातील एका उच्चभ्रू वसाहतीत चालणाऱ्या कुंटणखान्याचा पुंडलिकनगर पोलिसांनी पर्दाफाश केला. याठिकाणी छापा मारून कुंटणखाना चालविणाऱ्या एका महिलेसह दोन मुलींना ताब्यात घेण्यात आले आहे.

सातारा परिसरातील एका रो-हाऊसमध्ये वेश्‍या व्यवसाय सुरू असल्याची माहिती सहायक पोलिस निरीक्षक घनश्‍याम सोनवणे यांना मिळाली होती. त्यांनी पोलिस उपनिरीक्षक विकास खटके यांचे पथक तयार करून याठिकाणी गुरुवारी (ता. चार) सायंकाळी एक पंटर पाठविला. पंटरला एका दलालाने रो-हाऊसमध्ये नेले. दलालाने पैसे घेऊन मुलींजवळ सोडताच काही वेळात पोलिस उपनिरीक्षक खटके, रमेश सांगळे, पोलिस नाईक बाळाराम चौरे, पोलिस शिपाई शिवाजी गायकवाड, जालिंदर मांटे, विलास डोईफोडे, राजेश येदमळ, दीपक जाधव, महिला शिपाई नंदा गरड, नंदा तिडके यांनी छापा मारला. याठिकाणी असलेल्या दोन मुलींसह कुंटणखाना चालविणाऱ्या महिलेला ताब्यात घेतले. या प्रकरणी दोघांवर गुन्हा दाखल करण्यात आला असून, तुषार राजू राजपूत (३५, रा पेन्शनपुरा, छावणी), प्रवीण बालाजी कुरकुटे (३५, रा. अलोकनगर, बीड बायपास) अशी आरोपींची नावे आहेत. ४५ हजार ५०० रुपये याप्रकरणी सातारा पोलिस ठाण्यात गुन्हा नोंदविण्यात आला असून, तपास पोलिस निरीक्षक अनिल आडे करीत आहेत. ही कारवाई पोलिस आयुक्त चिरंजीव प्रसाद, पोलिस उपायुक्त राहुल खाडे, सहायक पोलिस आयुक्त जी. एस. सावंत यांच्या मार्गदर्शनाखाली करण्यात आली.