धुळे जिल्ह्यातील साक्रीतील निजामपूर गावातून एक धक्कादायक बातमी समोर येत आहे. मुलींची छेड काढल्याचा जाब विचारणाऱ्या बाप लेकावर जमावाने हल्ला करुन त्यांना बेदम मारहाण केली आहे. या मारहाणीत गंभीर जखमी झालेल्या एकाचा मृत्यू झाला असून दुसरा युवक नंदुरबारच्या रुग्णालयात उपचार घेत आहे.

घडलेली घटना अशी की, निजामपूर येथे राहणाऱ्या दोन मुली किराणा दुकानाकडे जात असताना गावातील सागर आणि मगन या दोन मुलांनी त्यांचे हात पकडून त्यांची छेड काढण्याचा प्रयत्न केला. यावेळी असरार मुनाफ मणियार यांनी या दोघा मुलांना छेड काढू नका, असे सांगून तिथून हटकून लावण्याचा प्रयत्न केला असता सागर आणि मगन यांनी असरारला बेदम मारहाण करण्यास सुरुवात केली. सागर याच्या हातात असलेल्या फळीला खिळे ठोकलेले असल्याने असरार मणियार याला गंभीर स्वरुपाच्या जखमा झाल्या आहेत.

काही काळात असरारचे वडील मुनाफ गफ्फार मणियार हे भांडण सोडवण्यासाठी गेले असता त्यांना घटनास्थळावर असणाऱ्या अनिल, सतीश, शुभम, गोल्या आणि राकेश यांनी मारहाण करण्यास मदत केली. सागर खैरनार याने हातातील फळीने मुनाफ यांना डोक्याच्या मागील बाजूस गंभीर वार केला. त्यामुळे मुनाफ जमिनीवर कोसळले तसेच असरारही गंभीर जखमी होऊन जमिनीवर पडला होता. त्याच्या नाकातून रक्त निघत असल्याने त्याला जैताणे येथील ग्रामीण रुग्णालयात नेले.

मुनाफ मणियार यांच्या नातेवाईकांनी त्यांचा मृतदेह निजामपूर पोलीस ठाण्याच्या आवारात आणून ठेवला. आरोपींना अटक केल्याशिवाय पुढील कार्यवाही करणार नसल्याची भूमिका घेतल्यामुळे तणावाचे वातावरण निर्माण झाले होते. पोलिस पथकाने तातडीने हालचाली करत पाच आरोपींना ताब्यात घेतले आहे. आरोपींचे अटक सत्र सुरु झाल्यामुळे नातेवाईकांचा रोष कमी झाला. यादरम्यान रात्री सात जणांच्या विरोधात वेगवेगळ्या कलमांन्वये निजामपूर पोलीस ठाण्यात गुन्हा दाखल करण्यात आला आहे.

दरम्यान, आरोपींना अटक केल्याशिवाय मृतदेह नेणार नसल्याची भूमिका संबंधितांनी घेतल्या. त्यामुळे पोलीस पथकाने पहाटेपर्यंत पाच आरोपींना बेड्या ठोकल्या आहेत. दरम्यान गावात शांततेचे वातावरण असून नागरिकांनी अफवांवर विश्वास ठेऊ नये, असे आवाहन पोलीस अधीक्षक प्रवीणकुमार पाटील यांनी केले आहे.