छत्रपती संभाजीनगर : सात जणांचे टोळके एका लॉजवर गेल्यानंतर त्यांनी लॉज व्यवस्थापकाला मला गणेशभाऊ का म्हटला नाही असे म्हणत बेदम मारहाण केली. ही घटना ३० जून रोजी रात्री साडेदहा ते अकरा वाजेदरम्यान केंब्रिज चौक परिसरातील हॉटेल विजयराज लॉजिंगमध्ये घडली.

याप्रकरणी मारहाण करणाऱ्या दोघा आमदारांसह इतर नऊजणांविरोधात एमआयडीसी सिडको पोलिस ठाण्यात १ जुलै रोजी गुन्हा दाखल करण्यात आला आहे.

याप्रकरणी रवि नारायण दळवी (३१, रा. ता. सिल्लोड) यांनी दिलेल्या फिर्यादीनुसार ते सदर परिसरात लॉज चालवितात. ३० जूनच्या रात्री दोघांची आमदार ही टोपण नावे असलेले आणि तर त्यांचे सातजण साथीदार हे दळवी यांच्या लॉजवर आले. तिथे लॉजचे व्यवस्थापक मंगेश शेलार यांना आरोपींनी गणेशबाबत विचारणा केली असता, मंगेश याने कोण गणेश पाहिजे असे उद्धटपणे म्हटला, राग आल्याने त्यावर आरोपीने गणेशभाऊ का म्हटला नाही असे म्हणत शेलार याला मारहाण करण्यास सुरवात केली.

त्यावेळी सर्व साथीदारांनी बेदम मारहाण केल्याचे फिर्यादीत म्हटले आहे. आरोपींनी बेदम मारहाण करत यानंतर तुम्ही लॉजिंग कशी चालवितो असे म्हणत ठार मारण्याची धमकी दिली. दरम्यान लॉजच्या सीसीटीव्हीमध्ये पाहिले असता, तसेच चौकशीअंती दोघांना आमदार या टोपण नावाने ओळखत असल्याचे समोर आले. याप्रकरणी एमआयीसी सिडको पोलिस ठाण्यात गुन्हा दाखल झाला असून अधिक तपास सहायक फौजदार सोनार हे करत आहेत.