हिंगोली : हिंगोली शहरातील विविध भागांत रस्त्यावर उभ्या असलेल्या वाहनातील डिझेल चोरून विक्री करणारी टोळी शहर (Hingoli) पोलिसांनी जेरबंद केली असून त्यांच्याकडून दीडशे लिटर डिझेल व एक क्रुझर वाहन बुधवारी (ता.१३) जप्त करण्यात आली आहे. हिंगोली शहरात मागच्या काही दिवसांपासून ठिकठिकाणी पार्किंगमध्ये उभे असलेले ट्रक, टेम्पो व इतर वाहनांचे डिझेलच्या टाकीचे लॉक तोडून त्यातील डिझेल चोरीला जाण्याचे प्रकार वाढले होते. शहरातील एनटीसी भागातील शेख जुबेर शेख जावेद यांनी त्यांचा टेम्पो हा ता. २८ सप्टेंबर रोजी उभा केला होता. एक ऑक्टोबरला सदर टेम्पोमधील दीडशे लिटर डिझेल (Diesel Theft) चोरीला गेल्याची बाब उघडकीस आली होती.

यावरून हिंगोली शहर पोलिस ठाण्यात अज्ञात आरोपींविरुद्ध गुन्हा दाखल करण्यात आला होता. शहर पोलीस ठाण्याचे पोलीस निरीक्षक पंडित कच्छवे यांच्या मार्गदर्शनाखाली तपास करण्यात आला. या भागातील सीसीटीव्ही फुटेज तपासण्यात आले. त्यावरून हिंगोली तालुक्यातील लोहगाव येथील शिवाजी जुमडे व गोपाल ढवळे या दोघांना पोलिसांनी ताब्यात घेतले आहे. त्यांच्या जवळून दीडशे लिटर डिझेलसह चोरी करिता वापरण्यात आलेली क्रुझर गाडी देखील जप्त करण्यात आली आहे.