परभणी : शासनाने कर्ज माफ केलेल्या लाभार्थी शेतकऱ्यांने मुख्यमंत्र्यांना मुलीच्या विवाहाचे आमंत्रण दिले होते. अधिवेशनामुळे मुख्यमंत्री, उपमुख्यमंत्री येऊ शकले नसल्याने शासनाचे प्रतिनिधी म्हणून जिल्हाधिकारी दीपक मुगळीकर यांच्यासह सहकार विभागातील अधिकारी  गुरुवारी (ता. पाच)  पिंगळी (ता., जि. परभणी) येथे वऱ्हाडी म्हणून उपस्थित राहात शेतकऱ्याच्या निमंत्रणाचा मान राखला.

नुकतीच राज्य शासनाने महात्मा जोतिराव फुले शेतकरी कर्जमुक्ती योजना जाहीर केली आहे. त्याअंतर्गत आधार प्रमाणीकरासाठी पायलट चाचणीसाठी परभणी जिल्ह्यात पिंगळी (ता. परभणी) व गिरगाव (ता.सेलू) या दोन गावांची निवड झाली होती. या दोन्ही गावांतील पात्र लाभार्थींनी जिल्हाधिकारी कार्यालयात ता. २५ फेब्रुवारी रोजी व्हिडिओ कॉन्फरन्सद्वारे थेट मुख्यमंत्री उद्धव ठाकरे, उपमुख्यमंत्री अजित पवार यांच्याशी संवाद साधला होता. या दरम्यान, पिंगळी येथील लाभार्थी शेतकरी विठ्ठलराव रुस्तुमराव गरुड यांनी संवाद साधताना कर्जमुक्ती योजनेत आपले एक लाख १५ हजार ८७५ रुपयांचे कर्ज माफ झाले असून मी चिंतामुक्त झाले आहे. त्यामुळे मुख्यमंत्री व उपमुख्यमंत्री यांनी आपल्या मुलीच्या विवाहास यावे, असे आग्रहाचे निमंत्रण दिले होते. 

हेही वाचा व पहा - Video : पाहा...कठाळ्यांच्या झुंजीने परभणीत काय झाले

पिंगळी येथे विवाह सोहळा
त्यानुसार गुरुवारी (ता. पाच) पिंगळी येथे श्री. गरुड यांच्या मुलीचा विवाह पार पडला. या वेळी मुख्यमंत्री, उपमुख्यमंत्री अधिवेशनामुळे येऊ शकले नाहीत.  मात्र, त्यांनी शासनाचे प्रतिनिधी म्हणून जिल्हाधिकारी दीपक मुगळीकर, औरंगाबाद विभागाचे सहनिंबधक योगीराज सुर्वे, अतिरिक्त  जिल्हाधिकारी डॉ. अरविंद लोखंडे, उपजिल्हाधिकारी डॉ. संजय कुंडेटकर, जिल्हा उपनिंबधक मंगेश सुरवसे, सहायक निबंधक उमेशचंद्र हुसे, कार्यालय अधीक्षक बी. एस. नांदापूरकर यांनी पिंगळी येथे विवाहास उपस्थित राहात  वधू-वरांना शुभेच्छा दिल्या. खुद्द जिल्हाधिकारी आल्याने वधू-वरांसह वधुपिता भारावून गेले होते.