लातूर : कोरोनामुळे या वर्षी दहावीच्या (Secondary School Certificate) सर्वच विद्यार्थ्यांना पास करण्यात येणार आहे. मराठवाड्यात (Marathwada) दहावीच्या विद्यार्थ्यांपेक्षा अकरावी प्रवेशाच्या जागा जास्त आहेत. पण, शैक्षणिक दृष्ट्या महत्त्वाच्या असलेल्या लातूर (Latur) व नांदेड (Nanded) जिल्ह्यात मात्र प्रवेशाच्या अडचणी येणार आहेत. यात शिक्षण विभाग कशा पद्धतीने मार्ग काढतो याकडे लक्ष लागले आहे. शैक्षणिक वर्ष २०२०-२१ मध्ये कोरोनामुळे दहावी परीक्षेसाठी पात्र असलेल्या सर्व विद्यार्थ्यांना अंतर्गत मूल्यमापनाच्या आधारे सरसकट उत्तीर्ण करण्यात येणार आहे. त्यामुळे मराठवाड्यात दोन लाख ९५ हजार ३१७ विद्यार्थी पास होणार आहेत. त्यांना अकरावीत प्रवेश दिला जाणार आहे. यात मराठवाड्यात अकरावीच्या तीन लाख ३३ हजार ५५० जागा आहेत. (Eleventh Class Student Numbers High Than Tenth In Marathwada Region)

लातूर, नांदेडमध्ये अडचण

लातूर व नांदेड हे दोन्ही जिल्हे शैक्षणिक दृष्ट्या महत्त्वाची आहेत. यात दहावीच्या विद्यार्थ्यापेक्षा अकरावीची प्रवेश क्षमता कमी आहे. लातूर जिल्ह्यात दहावीचे ४२ हजार ५०९ विद्यार्थी असून, अकरावीची प्रवेश क्षमता ४१ हजार ४० आहे. म्हणजे एक हजार ४६९ विद्यार्थ्यांचा प्रवेशाचा प्रश्न आहे. तर नांदेड जिल्ह्यात ४५ हजार १७० दहावीचे विद्यार्थी असून, अकरावीच्या जागा ४० हजार ७४० आहे. त्यामुळे चार हजार ४३० विद्यार्थ्यांचा प्रवेशाचा प्रश्न आहे. यात शिक्षण विभाग काय मार्ग काढणार याकडे लक्ष लागले आहे.

नामांकित महाविद्यालयासाठी लागणार कस

दरवर्षी नामांकित महाविद्यालयात प्रवेशासाठी चढाओढ असते. लातूरमध्ये तर ९७ ते ९८ टक्क्यालाच प्रवेश बंद होतात. यावर्षी मात्र अकरावीच्या प्रवेशासाठी शंभर गुणाची सीईटी घेतली जाणार आहे. या गुणावरच प्रवेश दिला जाणार आहे. त्यामुळे नामांकित महाविद्यालयात प्रवेशासाठी विद्यार्थ्यांचा कस लागणार आहे.