जिंतूर (जि.परभणी) : आमच्या जवळचे नातेवाईक वारले आहेत, त्यांच्या अंत्यसंस्काराला आम्ही जात आहोत, अशी बतावणी करून जमावबंदी आदेशाचे उल्लंघन करून हिंगोली जिल्ह्यातून परभणी जिल्ह्यात प्रवेश करणाऱ्या सहा जणांविरुद्ध जिंतूर पोलिसात गुन्हा दाखल करण्यात आला. सदरील वाहन पोलिसांनी ताब्यात घेतले आहे.

जिंतूर शहरातील फतंन कॉलनीमध्ये एका विवाह सोहळ्यासाठी औंढा तालुक्यातील गोरेगाव व पुसेगाव येथील काही नागरिक (एमएच ११ - एम ११७५) या वाहनाने १५ एप्रिल रोजी सकाळी ४:४५ ला जिंतूरला पोचले. अण्णा भाऊ साठे यांच्या पुतळ्याजवळ पेट्रोलिंग करणारे सहायक पोलिस निरीक्षक अभय दंडवत यांनी संबंधितांची चौकशी केली असता जिंतूर शहरातील आमचे नातेवाईक नामे समंदर ऊर्फ कलंदर ऊर्फ करीम याचे निधन झाले असून आम्ही अंत्यसंस्कारासाठी जात आहोत, अशी खोटी बतावणी केली. 

हेही वाचा- सोशल डिस्टन्सिंगचा उडाला फज्जा

चौकशीत खरा प्रकार समोर
पोलिसांनी संबंधितांना पोलिस स्थानकात आणून चौकशी केली असता संबंधित व्यक्ती जिंतूर येथील फतन कॉलनीतील एका विवाह सोहळ्यासाठी गोळेगाव येथून आले होते. पोलिसांनी जीप चालक नागोराव हरिभाऊ गुंजावळे, शेख नजीर शेख अहमद, आसेफबी शेख नजीर, निलोफर भ्र शेख मुनीर, शेख मेहमुदाबी भ्र मजिद, शेख मुनीर शेख कलीम हे तोंडाला मास्क न लावता पोलिसांना खोटी माहिती देऊन आपत्कालीन परिस्थिती असताना हिंगोली जिल्ह्यातून परभणी जिल्ह्यात बेकायदेशीर प्रवेश करताना आढळून आल्याने त्यांच्यावर राष्ट्रीय आपत्ती व्यवस्थापन कायद्यानुसार गुन्हा दाखल करण्यात आला आहे. पोलिसांनी सदरील वाहन जप्त केले आहे.

हेही वाचा-  Video: भुकेल्यांसाठी शिवभोजनाची थाळी ठरतेय तारक ​

हेही वाचा...

सामूहिक नमाज अदा करणाऱ्यांवर गुन्हे
जिंतूर (जि.परभणी) : जमाव बंदी आदेश असतानाही एका शेतामध्ये सामूहिकरीत्या जमून नमाज अदा केल्याबद्दल त्यांच्यावर जिंतूर पोलिसात राष्ट्रीय आपत्ती व्यवस्थापन कायद्यानुसार गुन्हा दाखल करण्यात आला आहे. ही घटना सोमवारी (ता.१३) दुपारी एकच्या सुमारास घडली. मात्र, या घटनेबाबतचा गुन्हा मंगळवारी (ता.१४) उशिराने दाखल झाला. येलदरी रोडवरील एका शेतात  तोंडाला मास्क न बांधता व शासकीय आदेशाचे उल्लंघन करुन सामूहिक नमाज अदा करण्यात येत होते.