नांदेड - येथील श्री गुरू गोविंदसिंघजी विमानतळ विस्तारीकरणाच्या कार्यवाहीला प्रारंभ करण्याबाबत सार्वजनिक बांधकाम मंत्री तथा पालकमंत्री अशोक चव्हाण आणि उद्योगमंत्री सुभाष देसाई यांची मुंबईत विधानभवनात बैठक झाली असून हे काम लवकरच सुरू होण्याची शक्यता आहे.

मुंबईला विधानभवनात गुरुवारी सायंकाळी याबाबत संबंधित विभागाचे अधिकारी आणि विभागप्रमुखांसोबत बैठक झाली. या बैठकीत नांदेड विमानतळाच्या विविध मागण्या आणि समस्यांबाबत विस्तृत चर्चा झाली. या वेळी आमदार अमर राजूरकर, माजी पालकमंत्री डी. पी. सावंत, उद्योग विभागाचे प्रधान सचिव वेणुगोपाल रेड्डी, महाराष्ट्र औद्योगिक विकास महामंडळाचे मुख्य कार्यकारी अधिकारी पी. अनबलगन, जिल्हाधिकारी डॉ. विपीन इटनकर आदी उपस्थित होते.

हे ही वाचा -  स्त्रीया का घालतात पैंजण - वाचा

सोयी - सुविधांबाबत कार्यवाहीच्या सूचना
या प्रसंगी नांदेडच्या विमानतळ परिचालनासंदर्भातील समस्या जाणून घेण्यात आल्या. त्याचबरोबर सदरील विमानतळाचे विस्तारीकरणासाठी काय करता येईल तसेच आणखी नवीन सोयी - सुविधा उभारण्याबाबत काय करता येईल , यावर प्रामुख्याने चर्चा झाली. नांदेड विमानतळाच्या परिचालनाबाबतच्या अडचणींसंदर्भात तातडीने आवश्यक कार्यवाही करण्याच्या सूचनाही यावेळी उद्योगमंत्री श्री. देसाई यांनी संबंधितांना दिल्या.

जमिनी ताब्यात घ्याव्यात
नांदेडच्या विमानतळावरून प्रवाशांची आणि विमानांची वाढती वर्दळ पाहता भविष्याच्या दृष्टिकोनातून नांदेड विमानतळाचे विस्तारीकरण करण्याची आवश्यकता असल्याचे पालकमंत्री अशोक चव्हाण यांनी या वेळी सांगितले. त्यानुसार सध्या दोन हजार तीनशे मीटर असलेल्या धावपट्टीचा तीन हजार दोनशे मीटर इतका विस्तार करणे, अग्निशमन सुविधा, विमानांसाठी हॅंगर, कर्मचाऱ्यांसाठी निवासस्थाने आदी कामांसाठी अतिरिक्त जमिनीची गरज आहे. त्यामुळे विमानतळाच्या परिसरात असलेली शासकीय जमीन ताब्यात घेण्यात यावी, अशी सूचना अशोक चव्हाण यांनी केली. त्यांच्या मागण्यांना उद्योगमंत्री सुभाष देसाई यांनी सकारात्मक प्रतिसाद दिला असून त्यामुळे नांदेड विमानतळाचे सुशोभीकरण, आधुनिकीकरण व विस्तारीकरणाला लवकरच सुरवात होईल, अशी अपेक्षा आहे.

हे ही वाचलेच पाहिजे - चक्क वनविभागाचे बनावट कार्यालय थाटून बेरोजगारांना ८२ लाखाचा गंडा

विमानतळाला प्रवाशांचा प्रतिसाद
नांदेडला विमानतळ सुरु झाल्यामुळे त्यास प्रवाशांचा चांगला प्रतिसाद मिळत आहे. मुख्य सचखंड गुरुद्वारा येथे असल्यामुळे देश विदेशातून शीख बांधव नांदेडला येतात. त्यात आता विमानाने येणाऱ्यांची संख्याही वाढली आहे. या विमानतळावरुन मुंबई, हैदराबाद, दिल्ली, चंदीगड, अमृतसरला जाणे सोपे झाले आहे. निरंतर सेवा सुरु असल्यामुळे नांदेड जिल्ह्यासह आजूबाजूच्या लातूर, बीड, परभणी, हिंगोली, आदिलाबाद, निजामाबाद, यवतमाळ जिल्ह्यातील प्रवाशांना त्याचा फायदा होत आहे.