लातूर: महाडीबीटी पोर्टलवर शेतकरी योजना या सदराखाली शेतकऱ्यांच्या सोयीसाठी सर्व योजनांचा लाभ 'एकाच अर्जाद्वारे' देण्यात येत आहे. यासाठी अर्ज करण्यापासून ते प्रत्यक्ष लाभ मिळणे पर्यंत एकात्मिक संगणकीय प्रणाली विकसित केली आहे. आता अर्ज करण्याची मुदत २० मे पर्यंत वाढवण्यात आली आहे.

या प्रणालीद्वारे शेतकऱ्यांना त्यांच्या पसंतीच्या बाबीच्या निवडीचे स्वातंत्र्य देण्यात आले असून शेतकऱ्यांनी शेती निगडीत विविध बाबी करिता अर्ज करावयाचा आहे. यातील बियाण्यांचा लाभ घेण्यासाठी महाडीबीटी पोर्टलवरील शेतकरी योजनेत बियाण्यांचा लाभ घेण्यासाठी अर्ज करण्याची सुविधा उपलब्ध करून देण्यात आली आहे. या सुविधेत लाभार्थीना राष्ट्रीय अन्न सुरक्षा अभियानातून सोयाबीन, भात तूर मूग उडीद मका, बाजरी आदी बियाणे अनुदानावर उपलब्ध होणार आहे. यासाठी पूर्वी अर्ज करण्याची अंतिम तारीख १५ मे होती. मात्र, क्षेत्रीय स्तरावरील अधिकाऱ्यांच्या मागणीनुसार ही मुदत आता २० पर्यंत वाढवण्यात आल्याचे जिल्हा अधीक्षक कृषी अधिकारी दत्तात्रय गावसाने यांनी सांगितले.

असा आहे संकेतस्थळ
महाडीबीटी पोर्टलचे https;//mahadbtmahait.gov.in हे संकेतस्थळ आहे. या संकेतस्थळावरील शेतकरी योजना हा पर्याय निवडावा. शेतकरी मोबाईल, संगणक, लॅपटॉप, टॅब, सामुदायिक सेवा केंद्र व ग्रामपंचायतील संग्राम केंद्राच्या माध्यमातून अर्ज करू शकतात. वैयक्तिक लाभार्थी म्हणून नोंदणी करू इच्छिणाऱ्या सर्व शेतकऱ्यांना त्यांच्या आधार क्रमांक सदर संकेतस्थळावर प्रमाणित करून घ्यावा लागेल. वापरकर्त्याकडे आधार क्रमांक नसेल त्यांनी योजनासाठी अर्ज करता येईल.

अशा अर्जदारांना अनुदान वितरित करण्यापूर्वी महाडीबीटी पोर्टलमध्ये त्यांना देण्यात येणारा आधार क्रमांक नोंदणीकृत करून प्रमाणित करून घ्यावे लागेल त्याशिवाय त्यांना अनुदानाचे वितरण करण्यात येणार नाही. अर्ज करण्यासाठी तांत्रिक अडचण आल्यास helpdeskdbtfarmer@gmail.com या ईमेलवर किंवा ०२०-२५५११४७९ या दूरध्वनी क्रमांकावर संपर्क साधावा, असे आवाहन श्री. गावसाने यांनी केले आहे.