सेनगाव (हिंगोली) : तालुक्यातील वाघजळी शिवारात वीज पडून तरुण शेतकऱ्याचा मृत्यू झाल्याची घटना (ता.१०) शनिवारी सायंकाळी घडली आहे.

सेनगाव तालुक्यातील वाघजाळी येथे शेतात हळद झाकण्यासाठी गेलेल्या तरुण शेतकऱ्याच्या अंगावर वीज कोसळल्याने मृत्यू झाला आहे. लक्ष्मण नारायण तांबिले (वय ४५) असे शेतकऱ्याचे नाव असल्याचे तहसील प्रशासनाने सांगितले. शनिवारी सकाळपासूनच ढगाळ वातावरण निर्माण झाले होते. सायंकाळच्या सुमारास सेनगाव तालुक्यातील काही भागात वादळी वाऱ्यासह पावसाला सुरुवात झाली.

तालुक्यातील वाघजाळी येथे सायंकाळी पाच वाजता वादळी वारे व मेघगर्जनेसह जोरदार पाऊस सुरु झाला. त्यामुळे शेतात काढून ठेवलेले हळदीच्या पिकाचे नुकसान होऊ नये, यासाठी शेतकरी लक्ष्मण तांबिले हे शेतात हळदीचे पिक झाकण्यासाठी गेले. या पिकावर ताडपत्री टाकत असताना त्यांच्या अंगावर वीज कोसळून ते जखमी अवस्थेत जागीच कोसळले. शेतात वीज  पडल्याने मोठा आवाज झाला. त्यामुळे परिसरातील शेतकरी घटनास्थळाकडे धावले. त्या ठिकाणी तांबिले गंभीर जखमी अवस्थेत असल्याचे दिसून आले. त्यांना तातडीने उपचारासाठी रुग्णालयात नेत असतानाच त्यांचा रस्त्यातच मृत्यू झाला.

माळहिवरा फाट्यावर द बर्निग ट्रकचा थरार; औषधीसह इलेक्ट्रॉनिक साहित्य जळाले

दरम्यान त्यांचा मृतदेह उत्तरीय तपासणीसाठी रिसोड येथील शासकिय रुग्णालयात पाठविण्यात आला असून उत्तरीय तपासणीच्या अहवालानंतर शासनाच्या नियमानुसार मदत दिली जाणार असल्याचे तहसील प्रशासनाने सांगितले आहे. दरम्यान सध्या सेनगाव तालुक्यात हळद काढणीच्या कामाला वेग आल्याने हळद काढणी सुरू आहे. शेतात हळदीची ढिगारे लागले आहेत. त्यात अवकाळी पावसाने हळदीचे नुकसान होऊ नये म्हणून शेतकरी ते ढिगारे झाकून ठेवत आहेत. श्री. तांबिले देखील हळदीचा ढिगारा झाकत असताना ही घटना घडली आहे. त्यांच्या निधनाने हळहळ व्यक्त केली जात आहे.