हिंगोली : हिंगोली मध्ये एम् आय एम् चे पदाधिकारी व भाजपच्या पदाधिकाऱ्यांमध्ये तुफान मारहाणीची घटना शनिवारी (ता. 3) घडली आहे. 

या हाणामारीत दहा ते पंधरा जण गंभीर जखमी झाले आहेत. तर दोन ते तीन जणांची प्रकृती चिंताजनक आहे.  हिंगोली शहरालगत गारमाळ भागात एम. आय. एम. चे जिल्हाध्यक्ष शेख  बुरहान पहेलवान व भाजपचे अल्पसंख्यांक विभागाचे पदाधिकारी हमीद प्यारेवाले यांच्या समर्थकांमध्ये मागील काही दिवसांपासून वाद सुरू होता. आज सकाळी हा वाद उफाळून आला. शाब्दीक चकमकीनंतर हाणामारीला सुरुवात झाली. हातात पडेल त्या साहित्याने मारहाण सुरू होती. दोन्ही गटाकडील शंभर ते दिडशे लोकांनी 
एकमेकांच्या घरावर तुफान दगडफेक करत प्रचंड गोंधळ घातला.

दरम्यान घटनेची माहिती मिळताच पोलिस उपाधिक्षक राहूल मदने, पोलिस निरीक्षक उदयसिंह चंदेल यांच्या पथकाने  घटनास्थळी धाव घेतली. दंगा काबू पथक देखील घटनास्थळी दाखल झाल्यानंतर परिस्थिती नियंत्रणामध्ये आली आहे.मारहाणीत गंभीर जखमी झालेल्या तीन ते चार जणांना हिंगोलीच्या जिल्हा सामान्य रुग्णालयात दाखल केले आहे.  यातील दोन ते तीन जणांची प्रकृती चिंताजनक असल्याने त्यांना नांदेडच्या जिल्हा रुग्णालयांमध्ये पाठविण्यात आले आहे.