औरंगाबाद - मराठवाड्यातील शेतकरी आत्महत्येचे सत्र थांबता थांबेना. रविवारी पुन्हा चार शेतकऱ्यांच्या आत्महत्या समोर आल्या आहेत. परभणी, उस्मानाबाद, बीड आणि जालना जिल्ह्यातील या घटना आहेत.

तिडी पिंपळगाव (ता. सेलू) येथील चांगोजी काशिनाथ निर्वळ (वय 70) यांनी रविवारी दुपारी नापिकीला कंटाळून विष घेऊन आत्महत्या केली. त्यांच्यावर बॅंकेचे कर्ज होते. दुसऱ्या घटनेत एकुरगा (ता. उमरगा) येथे कर्ज व नापिकीला कंटाळून सोजरबाई नारायण शिंदे (वय 70) यांनी रविवारी सकाळी विहिरीत उडी घेऊन आत्महत्या केली. तिसऱ्या घटनेत मौजे नंदगौळ (ता. परळी वैजनाथ) येथे बॅंक आणि सावकाराच्या कर्जाला कंटाळून पांडुरंग सिद्राम गित्ते (वय 60) यांनी शुक्रवारी शेतात विष प्राशन करून आत्महत्या केली. नांदखेडा (ता. जाफराबाद) येथील ऋषिंद्र शेषराव सवडे (वय 36) यांनी नापिकी आणि कर्जाला कंटाळून गळफास घेऊन आत्महत्या केली.