बेंबळी (जि.उस्मानाबाद) : बेंबळी येथून जवळच असलेल्या शिवाजीनगर (ता.उस्मानाबाद) येथील एका सात वर्षीय लहान मुलीचा बुधवारी (ता.२१) शेततळ्यात बुडून मृत्यू झाला आहे. वैष्णवी कुणाल सोनटक्के असे मृत मुलीचे नाव आहे. उस्मानाबाद शहरात राहणारे वैष्णवीचे कुटुंब तिच्या आजीच्या अंत्यविधीसाठी शिवाजीनगर येथे आले होते. मंगळवारी (ता.२०) वैष्णवीची आजी शोभा सोनटक्के यांचा मृत्यू झाला होता.

उस्मानाबाद जिल्ह्यात अल्ववयीन मुलीवर सामुहिक अत्याचार; पीडिता कोमात, तिघांविरुध्द गुन्हा दाखल

दुसऱ्यादिवशी बुधवारी सकाळी घरातील सर्व मंडळी अंत्यविधीसाठी गेल्यानंतर घरामागे असलेल्या शेततळ्यात लहान मुले खेळत होते. सकाळी साडेदहाच्या सुमारास ही घटना घडली आहे. दरम्यान शेततळ्यात गेलेली ही मुले येथील अन्य एका मोठ्या मुलीने पाहून आरडाओरडा केल्याने लोकांनी त्यांना बाहेर काढले. तिघांना बेंबळी येथील प्राथमिक आरोग्य केंद्रात आणण्यात आले होते. मात्र तोपर्यंत वैष्णवीचा मृत्यू झाला होता. अन्य दोघा मुलांची तब्येत चांगली असल्याने त्यांना घरी पाठविण्यात आले आहे, असे बेंबळी प्राथमिक आरोग्य केंद्राचे वैद्यकीय अधिकारी डॉ. रोहित राठोड यांनी सांगितले.

संपादन - गणेश पिटेकर