वसमत ( जिल्हा हिंगोली ) : तालुक्यातील शिरडशहापुर येथे आदिवासी आश्रमशाळा उभारणीला मंजुरी मिळाली असून त्यासाठी १४ कोटी ५१ लाख रुपयांचा निधी मंजूर झाला असल्याची माहिती आमदार राजू नवघरे यांनी दिली.

वसमत मतदार संघातील तसेच परिसरातील अनुसूचित जमातींच्या मुला- मुलींना उच्च शिक्षणाची सोय व्हावी व त्यांची शैक्षणिक उन्नती व्हावी या उद्देशाने शिरडशहापूर ता. औंढा नागनाथ येथे शासकीय आदिवासी आश्रमशाळा उभारण्यात अशी अपेक्षा पालकांमधून व्यक्त केली जात होती. तसेच याबाबत वसमत मतदारसंघातील नागरिकांनी आमदार राजू नवघरे यांच्याकडे मागणी केलु होती.

हेही वाचा - नांदेड महापालिकेच्या हद्दवाढीवरुन राजकारण नको; विकासावर व्हावी चर्चा

आमदार राजू नवघरे व आदिवासी प्रकल्प अधिकारी डॉ. विशाल राठोड यांनी आश्रमशाळेच्या मंजुरीसाठी व निधीसाठी शासनाकडे वारंवार पाठपुरावा केला होता. या पाठपुराव्याला यश आले असून आदिवासी विद्यार्थ्यांना उच्च शिक्षण सोबतच निवासाची व्यवस्था व्हावी यासाठी औंढा तालुक्यातील शिरडशहापूर येथे आश्रम शाळा उभारण्यासाठी मंजुरी मिळाली असून इमारत बांधकामासाठी १४ कोटी ५१ लाख रुपयांचा निधी मंजूर झाला असल्याची माहिती आमदार राजू नवघरे यांनी दिली. आश्रमशाळेला निधी उपलब्ध करुन दिल्याबद्दल आमदार राजु नवघरे यांनी उपमुख्यमंत्री अजितदादा पवार तसेच मंत्री श्री. पाडवी यांचे आभार मानले आहेत.

संपादन- प्रल्हाद कांबळे