हिंगोली : शहरातील गणेशवाडी भागात रस्त्याच्या कामात अडथळा असलेल्या अतिक्रमणांवर पालिका प्रशासनाच्या पथकाने शनिवारी हातोडा मारला. जेसीबीच्या मदतीने अतिक्रमणे जमीनदोस्त केली जात आहेत. येत्या काही दिवसांतच रस्त्याच्या कामाला सुरुवात केली जाणार आहे.

हिंगोली पालिकेला नागरी भागात पायाभूत सुविधा उपलब्ध करणे, या योजनेमध्ये पाच कोटी रुपयांचा निधी मंजूर झाला आहे. या निधीतून गणेशवाडीभागात हनुमान मंदिरापासून रस्त्याचे काम मंजूर करण्यात आले आहे. १२ मिटर अंतराच्या या रस्त्याचे पालिकेकडून मोजमापही घेण्यात आले होते.

यामध्ये अनेक नागरिकांनी रस्त्यावरच अतिक्रमण करून पक्की बांधकामे केल्याचे आढळून आले होते. यामुळे पालिकेचे मुख्याधिकारी अरविंद मुंडे यांनी अतिक्रमण धारकांना एक महिन्यापूर्वी अतिक्रमण काढून घेण्याबाबत नोटीस दिल्या होत्या. मात्र, अतिक्रमणधारकांनी मुदतीमध्ये अतिक्रमण काढले नाही.

त्यामुळे शनिवारी मुख्याधिकारी श्री. मुंडे, नगर अभियंता रत्नाकर अडशिरे, स्वच्छता निरीक्षक बाळू बांगर यांच्यासह कर्मचाऱ्यांच्या पथकाने गणेशवाडी भागात पाहणी केली. त्यानंतर तातडीने जेसीबी व पोलिस पथक बोलावून अतिक्रमण हटविण्यास सुरवात केली. या अतिक्रमणामध्ये पाच पक्की बांधकामे असून, चार टीनपत्र्यांचे शेड आहेत. तसेच इतर कच्ची बांधकामे आहेत. या सर्व अतिक्रमणांवर पालिकेने हातोडा चालविला आहे.

पुढील काही दिवसांतच या ठिकाणी अतिक्रमण काढल्यानंतर रस्त्याच्या कामाला सुरवात केली जाणार आहे. या रस्त्यामुळे गणेशवाडी भागातील नागरिकांचा वाहतुकीचा प्रश्न मार्गी लागणार आहे.