हिंगोली : हिंगोली शहर व परिसरासह सेनगाव तालुक्यातील काही गावात गुरुवारी (ता. २३) सलग चौथ्या दिवशीही सकाळी नऊ वाजल्यापासून साडे अकरापर्यंत रिमझिम पाऊस सुरू झाला असुन ढगाळ वातावरण निर्माण झाले आहे. सलग होत असलेल्या पावसाने जनजीवन विस्कळीत झाले आहे. जिल्ह्यात सोमवार, मंगळवारी, बुधवार असा सलग तीन दिवस पाऊस झाला.

आज सकाळी हिंगोली शहर व परिसरातील बासंबा, सिरसम, भांडेगाव, साटंबा, पारोळा, फाळेगाव, पिंपरखेड, कारवाडी, कोथळज, सवड, पांगरी, खांबाळा, सावरखेडा, खानापूर आदी गावासह सेनगाव तालुक्यातील गोरेगाव व परिसरातील गावात सकाळी नऊ वाजता पावसाची रिमझिम सुरू झाली ती साडेअकरा पर्यंत कायम होती.

त्यानंतर पावसाने उघडीप दिली मात्र ढगाळ वातावरण कायम होते. सकाळी काही वेळ ऊन देखील पडले होते. मात्र नंतर ढगाळ वातावरण व पावसाची रिमझिम सुरू झाली. तर यावेळी कळमनुरी, वसमत, सेनगाव व औढा शहरात ढगाळ वातावरण होते. सलग चार दिवसापासून हिंगोली शहरासह परिसरात होत असलेल्या पावसाने जनजीवन विस्कळीत झाले आहे.

शहरातील अनेक वसाहतीत जाणारे रस्ते चिखलमय झाले आहेत. तर शहरातील सखल भागात पावसाचे पाणी जमा झाले आहे. सलग होणाऱ्या या पावसाने बाजारात शुकशुकाट आहे. दरम्यान, या पावसाने सोयाबीन काढणीस व्यत्यय आला आहे. तालुक्यातील भांडेगाव शिवारात काढणी केलेल्या सोयाबीन पिकात पावसाचे पाणी जमा झाल्याने अनेक शेतकऱ्यांचे मोठे नुकसान झाले आहे. या भागात होत असलेल्या पावसाने कापूस पिकांचे देखील नुकसान झाले असल्याचे शेतकरी सांगत आहेत.